Os campións de pesca submarina volverán decidirse o vindeiro domingo en Pontevedra
Por Redacción
O XXVI Campionato Virxe Peregrina de Pesca Submarina desenvolverase este domingo 25 de agosto, organizado polo Club Sotavento. Mentres que a competición terá lugar en Sanxenxo e O Grove, a pesada de pezas e entrega de trofeos aos gañadores será na Praza da Verdura de Pontevedra.
O regulamento válido para a competición é o da Federación Galega de Actividades Subacuáticas e realízase na modalidade de infantería individual. A concentración de participantes será ás 8.00 horas na praia da Barrosa, en San Vicente (O Grove) e ás 9.00 horas será a saída. A zona de pesca establecida estará entre a praia de Canelas en Sanxenxo e o peirao de Pedras Negras en San Vicente. Ás 13.00 darase por concluída a proba.
As pezas capturadas entregaranse á organización para depositalas e conservalas nun camión isotermo. Pola tarde, a partir das 16.30 horas, aproximadamente, na Praza da Verdura de Pontevedra procederase a pesar as pezas, o xurado determinará os gañadores e procederá á entrega de trofeos entre as diferentes categorías. Tamén haberá sorteo de agasallos para os participantes. Como é habitual os peixes capturados serán entregados ao Comedor de San Francisco.
A organización estima que unhas corenta persoas inscribiranse nesta edición. Unhas inscricións que poden formalizarse ata a mesma mañá da proba na propia praia, presentando a correspondente licenza de pesca e a da Federación. Este campionato volve estar incluído nas probas da Federación Galega para a súa segunda Copa Galicia.
Relacionadas:
-
O Campionato de España de Pesca Submarina, por primeira vez en Sanxenxo
Por Redacción |
-
Pilar Barros e Jorge Candán, unha pontevedresa e un vigués na cima mundial do vídeo submarino
Por Natalia Puga |
-
Medio centenar de pescadores participarán o día 28 en San Vicente nun campionato de pesca submarina
Por Redacción |