"Festa rachada" por San Xoán en Caldas, con cacharela, 1.000 racións de sardiña, música e malabares con lume
Por Redacción
O Concello de Caldas de Reis promete "festa rachada" polo San Xoán, unha celebración na que haberá cacharela, sardiñada, música e malabares.
Desde o Concello decidiron encargarse da festa que tradicionalmente organizaba a veciñanza e os hostaleiros da contorna do río Bermaña co obxectivo de "potenciala e abrila a toda a xente que queira asistir".
O tenente de alcalde, Manuel Fariña, deu a coñecer a programación prevista no Campo da Torre para o domingo 23 e a madrugada do luns 24 de xuño, que inclúe a fogueira no medio do río Bermaña, na que se queimará a tradicional figura que veciñas e veciños poñen na cacharela.
A celebración comezarán xa pola tarde, a partir das 18 horas, cun obradoiro de herbas de San Xoán dirixido por Braulio Mondragón, que dirixirá ás persoas participantes para recoller na zona da Tafona as tradicionais sete plantas básicas que forman o ‘cacho’ co que lavar a cara e facer o ritual protector da noite máis curta do ano.
Ás 20.30 comezarán os pasarrúas do grupo tradicional ‘As Espiñas’ e unha hora despois dará comezo a sardiñada. Repartiranse de balde unhas 1.000 racións de sardiñas e pan e haberá polbo e churrasco a prezos populares.
Xa pola noite, sobre as 22.00 horas, comezará o concerto do grupo ‘Abril’ e, media hora antes do prendido das fogueiras, comezará o espectáculo de lume ‘Fire performance’ con malabares a cargo da compañía Asacocirco.
A gran cacharela do Bermaña prenderase á medianoite e despois haberá outro concerto de 'Catuxa Salom'.
Manuel Fariña fai unha chamada a veciñas e veciños de Caldas a asistir e subliña que a intención do Concello é facer unha festa "á altura que sempre se fixo", despois de que a pandemia e a falta de relevo xeracional deslucira a celebración nos últimos anos.
O nacionalista destacou que a noite de San Xoán Caldas terá tamén moitas outras cacharelas nas parroquias e fixo unha chamada á responsabilidade e a só prender as autorizadas nas condicións marcadas de seguridade.
Relacionadas:
-
San Xoán espanta o 'meigallo' á calor das fogueiras
Por Diego Espiño & Cristina Saiz |
-
"Por San Xoán, a sardiña molla o pan"
Por Redacción |
-
Este San Xoán non haberá cacharela nin sardiñada en Eduardo Pondal
Por Redacción |
-
A praia da Concha-Compostela queda sen fogueira e seguirá valada por treitos durante o verán
Por María José Pita |
-
Marín abre o prazo para solicitar fogueiras de San Xoán e urxe a limpeza de parcelas para loitar contra os incendios
Por Oskar Viéitez |
-
Seis días de festa en Poio para celebrar San Xoán
Por Redacción |