A plataforma única de Silgar estará rematada este venres cun total de 144.000 lastras azuis
Por Oskar Viéitez
Sanxenxo estreará nova unha fachada marítima este venres, 14 de xuño, cando está previsto que conclúa a plataforma única coa colocación de 144.000 lastras azuis.
Un traballo realizado nun total de 9 días no que, un equipo formado por 8 persoas, en exclusiva, encargáronse da instalación peza a peza nunha superficie de 4.783 metros cadrados.
A empresa adxudicataria, Construcións Castro Figueiro, mobilizou a un total de 50 traballadores que en dúas quendas encargáronse de realizar a obra en Avenida do Porto, Paseo de Silgar e Rúa Madrid. Aínda que os traballos previos como o fresado e as canalizacións comezaron antes, a instalación das pezas, de 9 quilogramos cada unha, iniciouse o pasado mércores, 5 de xuño.
O alcalde, Telmo Martín, lamenta as molestias ocasionadas polas obras e agradece a comprensión e apuntou que "está a merecer a pena".
O vindeiro sábado, recuperarase o tráfico rodado habitual, cunha excepcionalidade, no tráfico pesado. Os camións de máis de 3,5 toneladas que queiran acceder a esta zona pola plataforma única deberán solicitar permiso na Policía Local.
O obxectivo da actuación é mellorar a seguridade viaria e afianzar a prioridade peonil que se puxo en marcha no Paseo de Silgar, a Rúa Madrid e a Avenida do Porto co pintado do vial. Así, no mesmo espazo convivirán peóns e vehículos, pero nunha zona de tráfico acougado.
Ademais das instalacións de saneamento, melloráronse as instalacións lumínicas, renovando farois e cambiando luminarias por outras máis eficientes e, as do tramo de Rúa de Madrid ata a intersección coa Rúa Cesteiros, por outras de tecnoloxía led.
Relacionadas:
-
Habilitan catro zonas de carga e descarga no centro de Sanxenxo
Por Redacción |
-
A Rúa Madrid estrea novos farois e o entroque de Vidal Rocha e Paseo de Silgar, zona axardinada
Por Oskar Viéitez |
-
Habilitan un itinerario para manter aberto o aparcadoiro de Nauta
Por Oskar Viéitez |
-
Trece días de obras para converter o Paseo de Silgar en plataforma única
Por Redacción |
-
O Paseo de Silgar e a Rúa Madrid terán plataforma única e prioridade peonil
Por Redacción |