O aumento dos concursos de persoas físicas sobrecarga os xulgados mercantís de Pontevedra e Vigo
Por Redacción
A sobrecarga de traballo do xulgado do mercantil de Vigo obrigou a tomar a decisión de que os tres xulgados mercantís que hai na provincia de Pontevedra se repartan de forma trimestral todos os concursos de persoas físicas.
Así o autorizou a Comisión Permanente do Consello Xeral do Poder Xudicial (CGPJ), que deu o visto e prace ao acordo adoptado pola Sala de Goberno do Tribunal Superior de Xustiza de Galicia (TSXG).
Desta maneira, o maxistrado e as dúas maxistradas dos tres xulgados especializados en mercantil de Pontevedra asumirán esta rotación para aliviar a sobrecarga de traballo do xulgado que ten sede en Vigo, con competencia nos municipios de Vigo, Gondomar, Nigrán e Baiona.
O cambio, que implicará que a repartición dos concursos de persoas físicas teña ámbito provincial e sexa trimestral, entrará en vigor a partir do próximo 1 de xullo.
Desde entón e ata finais de setembro todos os procedementos dese tipo, tanto os ingresados en Pontevedra como en Vigo, asumiraos o Xulgado do Mercantil número 3; entre outubro e decembro, o número 2; e entre xaneiro e marzo, o número 1 -e así sucesivamente-.
Cada un dos tres xuíces farase cargo durante tres meses de todos os concursos de persoas físicas que se presenten na provincia, en lugar de facer fronte a unha entrada diaria deste tipo de casos, o que retarda o traballo dos xulgados.
Ata que entre en vigor esta modificación, a repartición continuará como ata o de agora.
Os ingresados en Pontevedra repártense entre dous xulgados, mentres que os de Vigo son asumidos polo único órgano con sede na cidade.
Aínda que a unidade con sede en Vigo é a máis conxestionada, nos tres xulgados aumentaron os concursos de persoas físicas.
En concreto, nos cinco primeiros meses deste ano o Xulgado do Mercantil número 1 de Pontevedra ingresou 113 casos deste tipo; o Xulgado do Mercantil número 2, 105; e o Xulgado do Mercantil número 3 -con sede en Vigo-, 151, é dicir o 41% do total.