As ludotecas de Carballedo, Tenorio e Cerdedo ampliarán horarios para fomentar a conciliación
Por Redacción
O Plan Concilia Verán 2024, tras realizarse un concurso público, permitirá que as tres ludotecas que se poñerán en marcha ofrezan un horario de atención desde as 08.30 ás 14.30 horas ao longo dos meses de xullo e agosto, entre luns e venres.
Auméntase desta forma unha hora diaria o servizo nas ludotecas de Carballedo, Tenorio e Cerdedo.
Atenderase a poboación infantil con idades comprendidas entre os 4 e os 12 anos.
As prazas serán limitadas e cun prezo por participante de corenta euros, non fraccionables.
O prazo de matrícula permanece aberto ata o luns 17 de xuño. Darase prioridade aos menores empadroados no municipio.
A matrícula deberá formalizarse na OMIX de Carballedo ou no departamento de Servizos Sociais da sede administrativa de Cerdedo. A selección realizarase por orde de inscrición.
A programación prevista inclúe deporte; reforzo do uso de lingua galega e inglesa; traballo colaborativo e en grupo con educación en valores e en hábitos saudables. Realizaranse rutas, actividades interactivas e psicomotrices, unha festa de auga, talleres de cociña, maquillaxe, papiroflexia ou de experimentos, entre outras propostas.
O goberno local de Cerdedo-Cotobade espera ofrecer atención a máis de 240 escolares promovendo a formación e o lecer ao mesmo tempo que se facilita a vida laboral dos seus familiares.
A actividade conta coa colaboración económica do Concello de Cerdedo-Cotobade, o Ministerio de Igualdade a través do Plan Corresponsables e da Consellería de Política Social e Igualdade da Xunta de Galicia.