ABAU 2024: O día que culmina un curso de nervios e tensión e que este ano lembra a Luisa Villalta
Por Natalia Puga & Mónica Patxot
O día máis esperado do curso chegou e na facultade de Comunicación de Pontevedra respírase unha mestura entre nervios e alivio.
406 estudantes de institutos da comarca foron citados neste centro para realizar a proba de de avaliación de bacharelato para o acceso á universidade (ABAU), que realizan ao mesmo tempo 12.996 alumnos e alumnas de Galicia, 1.280 no campus pontevedrés. Cada un víveo de forma diferente e as sensacións son imposibles de comparar, pero se algo é común a todos é a excitación ante unha xornada tan importante.
E é que a aqueles estudantes que aspiran a ir á universidade non se lles escapa que teñen nesta proba un desafío significativo. "Estou nerviosa pola presión que meten durante todo o curso. Sempre é: a ABAU, a ABAU", confesa unha alumna. "E por pensar que non chega a nota que necesitas", apunta a súa amiga.
Son dúas estudantes do IES Gonzalo Torrente Ballester de Pontevedra, Aitana e Érika, ambas as dúas inquietas tras pasar unhas últimas semanas intensas de estudo e tensión, pero un pouco máis tranquila pola tranquilidade de que o primeiro exame saíulles ben.
Foi "máis fácil do que pensaba", recoñecen, aínda que tamén apuntan que resultou atípico, pois esperaban un contido "diferente, nin máis fácil nin máis difícil, diferente". Non só a estas dúas mozas resultoulles inesperado este contido. O primeiro exame foi o de Lingua Galega e Literatura e na facultade de Comunicación pontevedresa, os estudantes consultados por PontevedraViva coinciden en que resultou inesperado o apartado de literatura.
Había un contido que podería resultar previsible, un texto de 1991 de Luisa Villalta, autora homenaxeada co Día das Letras Galegas 2024, pero o que ninguén esperaba é que o outro fose coetáneo, un de Agustín Fernández Paz do ano 2002. "Isto non adoita pasar, sempre poñen de distintas épocas", insiste o alumnado. E a maioría optou por centrarse noutras partes da proba, prescindindo da literatura.
Unha viñeta do debuxante Davila sobre o uso do galego e o inglés, un texto argumentativo sobre o Samaín e a concepción da morte na sociedade actual extraído de Gciencia, preguntas de sociolingüística sobre os bloques lingüísticos e os prexuízos á hora de falar galego, gramática, campo semántico… o resto do temario si se axustou máis a modelos de anos anteriores, aínda que houbo moitos alumnos aos que sorprendeu.
Foi "sorprendente", valoraron Ana, Carmen e Víctor, estudantes do IES A Xunqueira I. "Non é o típico", engaden, aínda que Ana e Carmen esperaban "que fose peor". O seu amigo Víctor non, para el resultou complicado e saíulle "fatal". Cada ano, con cada exame, sucede o mesmo, cada estudante víveo de forma diferente e o fácil e predicible para uns é complicado e imprevisto para outros.
Andrea e Judith, do IES A Xunqueira II, son amigas e compañeiras e tiveron experiencias moi diferentes. Ambas as dúas chegaron "moi nerviosas", pero, tras o primeiro exame, a súa reacción foi moi diferente. "Como xa fixen un, xa vou máis relaxada", di unha. A súa amiga, con todo, confesa: "agora estou moito máis nerviosa". No seu caso, as dúas últimas semanas estivo "fatal" e nada cambiou xa metida en faena.
Desde o IES de Poio chegaron a esta facultade Laura e Ainoa, que estas dúas últimas semanas estiveron "moi angustiadas". No seu caso, as opcións que barallan para a súa etapa universitaria non adoitan ter unha nota media moi elevada e calculan que poderán acceder, pero sentían moita tensión encima.
"Sempre está a presión de facelo o mellor posible", confesan. Polo menos, no seu caso, o exame de Lingua Galega e Literatura saíulles "bastante ben". Renunciaron á literatura, centráronse no resto do temario e saíron xa tranquilas para afrontar o resto da semana.
Relacionadas:
-
455 alumnos necesitaron adaptacións para facer o exame da ABAU, un 36,6% máis que o ano pasado
Por Oskar Viéitez & Mónica Patxot |
-
Comeza a ABAU en Pontevedra co destino universitario de 1.291 estudantes en xogo
Por Manu Otero & Mónica Patxot |
-
Unha quincena de alumnos con necesidades educativas especiais iniciaron as probas de selectividade na Once
Por Oskar Viéitez & Mónica Patxot |
-
Trescentos estudantes inician en Pontevedra as probas extraordinarias da ABAU
Por Redacción |
-
A Restauración borbónica e a construción do ferrocarril rebaixan a tensión no inicio da ABAU en Pontevedra
Por Manu Otero & Diana Eiras |
-
Xornada de nervios no campus, comezan os exames da selectividade
Por Redacción |