455 alumnos necesitaron adaptacións para facer o exame da ABAU, un 36,6% máis que o ano pasado
Por Oskar Viéitez & Mónica Patxot
O Centro de Recursos Educativos (CRE) da ONCE en Pontevedra acolle desde este martes a ABAU máis inclusiva, xa que 15 alumnos de toda Galicia con discapacidade examínanse neste centro, do 4 ao 6 de xuño.
Na nosa comunidade foron 455 os alumnos con necesidades especiais que pediron adaptacións dos exames, "isto é un 36,6% máis que o ano pasado, que é un incremento moi grande", indicou Iván Area, delegado da Universidade de Vigo na CIUG (Comisión Internuniversitaria de Galicia).
O tribunal especial que se constitúe no CRE da Once atende 15 mozos dos que catro teñen discapacidade visual, pero hai casuísticas de todo tipo como unha alumna con parálise cerebral ou un mozo, xogador de fútbol do Polvorín, que rompeu a man no último partido o que lle impide escribir.
Todos eles contan co apoio para enfrontarse a esta proba, garantindo a súa total accesibilidade física, a tecnoloxía e as adaptacións necesarias para cada caso, xa sexa un tempo adicional para realizar as probas, uso de medios tecnolóxicos, atención personalizada ou adaptación do formato dos exames, entre outras circunstancias. As máis comúns son as relacionadas coa lectoescritura.
"Nós temos que tentar que fagan as probas nas mellores condicións posibles", comentou Iván Area. "Se necesitan calquera cousa técnica, este centro é realmente excepcional para poder adaptar o que faga falta", engadiu.
No caso do resto de alumnos que pediron adaptacións concorren á Abau no mesmo centro que os seus compañeiros "para que estean o máis integrados posible".
Maioritariamente o que precisan é máis tempo para facer os exames ou unha correción de dislexia. Para eles están as aulas NEAE pensadas para atender as Necesidades Específicas de Apoio Educativo. En Pontevedra habilitáronse estas aulas na Facultade de Comunicación, en Ciencias da Educación e do Deporte e en Forestais.