A atención a pacientes crónicos, "un dos maiores retos" da sanidade galega
Por Redacción
Nos últimos catro anos, os pacientes crónicos aumentaron en Galicia un 3%. É case o dobre da media nacional, que se situou nun 1,7%. Por iso é polo que non sexa estraño que as autoridades sanitarias puxeran o foco nesta problemática.
A atención aos pacientes que sofren patoloxías crónicas "é un dos maiores retos" aos que ten que enfrontarse a sanidade galega, recoñeceu o conselleiro de Sanidade, Antonio Gómez Caamaño, na inauguración do décimo Congreso Nacional de Pacientes Crónicos.
Este evento, organizado pola Sociedade Española de Médicos de Atención Primaria (Semergen) en Pontevedra, reúne a especialistas de toda España que participarán en debates, seminarios e talleres sobre as últimas novidades xurdidas ao redor dos coidados ao pacientes crónico.
Ademais, tamén se mostrarán durante dous días os avances que se están producindo neste ámbito en materia de innovación e investigación.
Para Gómez Caamaño, a sanidade actual debe ter "especial atención" a adaptar as prestacións asistenciais ás "singularidades específicas" que presentan unhas poboacións cada vez máis lonxevas e, en consecuencia, con maiores índices de enfermidades crónicas.
Para facer fronte a esta conxuntura poboacional, o titular de Sanidade lembrou que a Xunta deseñou unha "folla de ruta" para atender ás persoas en situación de cronicidade.
Así, explicou que Galicia aposta por "poñer o foco" en definir un modelo asistencial proactivo coas persoas que padecen este tipo de enfermidades, manter unha continuidade asistencial e establecer un "modelo de atención corresponsable" cos pacientes.
A iso, Antonio Gómez Caamaño sumou o fomentar a investigación ao redor das doenzas crónicas, buscando novas liñas de traballo que acheguen solucións ás necesidades que presenta a atención á cronicidade.