SATSE alerta do peche de 92 camas este verán na área sanitaria
Por Anxo Lourido & Mónica Patxot
O Sindicato de Enfermería SATSE advirte do incremento do peche de camas hospitalarias no verán durante os últimos anos, acompañados de suspensión de centos de consultas, probas diagnósticas e intervencións cirúrxicas nos hospitais.
Na área sanitaria de Pontevedra indican que serán 92 as camas que se pechen este verán. En 2023 a cifra ofrecida era de 98 camas.
En Galicia a cifra prevista de peche ascende a 784 camas, sendo a área sanitaria de Ourense o único punto en que non está anunciado o peche, tal e como xa sucedía o ano pasado, segundo os datos que manexa SATSE.
Indican tamén que non se cobre o total das vacantes por período vacacional, baixas por enfermidade e outro tipo de situacións que requirirían substituír ao persoal, provocando unha sobrecarga laboral para o colectivo de enfermeiras que traballan no verán.
SINDICATO MÉDICO DE GALICIA (SIMEGA)
Pola súa banda, o Sindicato Médico de Galicia (SIMEGA), que pertence á Confederación Estatal de Sindicatos Médicos (CESM), considera un "mal menor" o Plan anunciado pola Xunta de Galicia para reforzar os médicos de Atención Primaria este verán.
Pide, en todo caso, que o Sergas actúe con máis previsión de futuro para evitar o déficit de profesionais durante o verán; unha situación que, lembran, rexístrase desde hai vinte anos.
Alertan de que as medidas están baseadas na voluntariedade dos facultativos e dos Residentes de Familia de cuarto curso, que deberán ser tutelados polo titor correspondente.
Lembran que trece dos catorce MIR da especialidade de Medicina de Familia da área de Pontevedra se incorporaron ao Plan do Sergas para paliar o déficit de facultativos no verán.
Seis deles traballarán en Centros de Saúde, dous en PACs e cinco en Urxencias hospitalarias.
SIMEGA "non ve mal" que se amplíe a todas as áreas sanitarias a bolsa de persoal voluntario dispoñible, en réxime de localización para cubrir o persoal médico dos Puntos de Atención Continuada (PAC), pero apunta a que seguramente serán "insuficientes".
Móstrase escéptico en canto a que os médicos do 061 poidan participar voluntariamente para cubrir as necesidades dos PAC ou servizos de urxencia hospitalaria, como anunciaba o presidente autonómico Alfonso Rueda.
En relación coa mobilidade temporal e voluntaria a centros que teñan especiais necesidades de cobertura durante o verán, a SIMEGA "non lle resulta moi atractiva" esta oferta xa que os médicos de Atención Primaria soportan axendas interminables ao longo do ano que lles "leva máis a un necesario descanso durante o verán que a seguir traballando en centros de saúde nos que nin sequera coñecen aos pacientes". Entenden que sería máis viable establecer colaboracións puntuais.
Relacionadas:
-
Sanxenxo pon ao dispor de Sanidade dúas vivendas para médicos
Por Redacción |
-
A área sanitaria garante a dispoñibilidade do 100% das camas este verán
Por Redacción |
-
O Gran Montecelo, coas obras ao 75% e previsión de poder funcionar a mediados de 2025
Por Natalia Puga |
-
A atención a pacientes crónicos, "un dos maiores retos" da sanidade galega
Por Redacción |
-
Potenciar a Atención Primaria, reto exposto na primeira visita a Montecelo do novo conselleiro de Sanidade
Por Mónica Patxot & Anxo Lourido |
-
O conselleiro asegura que este verán "a situación vai ser moitísimo mellor que o ano pasado" en Atención Primaria
Por Oskar Viéitez & Mónica Patxot |
-
Lamentan que a Xerencia da área sanitaria siga no propósito de pechar camas
Por Oskar Viéitez |