A veciñanza de Rebordelo quere unha senda peonil e medidas de calmado de tráfico
Por Oskar Viéitez
O alcalde de Cerdedo-Cotobade, Jorge Cubela, mantivo unha xuntanza de colaboración e traballo con membros da Asociación Cultural e Veciñal San Martiño de Rebordelo, que preside Daniel Fariña, na que se trataron diversos temas de interese para a veciñanza desta parroquia.
Jorge Cubela tomou nota das suxestións e necesidades trasladadas polos dirixentes veciñais e acordaron priorizar, entre varias actuacións, a roza e reposición de xabre da pista da parcelaria desde as Lagoas ata Carballedo; finalizar a actuación nos puntos de recollida selectiva en Pozo Negro e reposición de nova marquesiña e a revisión da iluminación pública en toda a parroquia así como a limpeza de cunetas en diversas zonas.
Outro dos puntos tratados tivo como protagonista a área recreativa e a praia fluvial de Pozo Negro onde se vai a afrontar por parte dos operarios municipais o bordo deste espazo lúdico e de lecer que tamén será dotado con papeleiras para concienciar aos visitantes da necesidade de depositar nestes recipientes o material de refugallo.
Ademais, tanto o alcalde como os representates veciñais centraron parte da xuntanza de colaboración e traballo en analizar a situación de seguridade viaria na estrada de vertebración principal da parroquia, dependente da Deputación de Pontevedra, para que en diversas zonas se leve a cabo a instalación de medidas de calmado de tráfico.
Así, tanto o Concello de Cerdedo-Cotobade como a propia asociación acordaron enviar senllos escritos á Deputación de Pontevedra para que instale bandas de redución de velocidade así como dunha senda peonil ao longo de toda a estrada que cruza a parroquia.