Moraña modernizará o local social do Buelo
Por Redacción
Algo máis de 47.000 euros destinará o Concello de Moraña a unha actuación encamiñada á modernización integral do local social do Buelo.
A remodelación consistirá no cambio de todas as súas carpintarías exteriores, a limpeza das fachadas e a reparación de fendas ou a limpeza e acondicionamento das xuntas dos muros.
Ademais, abordarase o cambio da súa cuberta, a adopción de medidas de illamento para favorecer a confortabilidade térmica interior e o pintado completo do inmoble.
Para financiar esta obra, Moraña botará man dunha achega de 33.254 euros das axudas para a corrección de impactos paisaxísticos do Instituto de Estudos do Territorio da Xunta de Galicia.
Estes cartos servirán tamén para abordar melloras en catro lavadoiros, fontes e antigos palcos de música, en concreto nos de Soar, Vilacoba, Saiáns e Corrigatos.
Así, a fonte de Vilacoba verá limpado e rozado o seu exterior ao tempo que se procederá á adecuación da súa contorna e tamén ao picado e selado da súa estrutura.
Do mesmo xeito, no lavadoiro de Soar executaranse estas mesmas obras e, a maiores, instalarase unha nova canalización de auga e dotarase de sinalización.
Os antigos palcos de música de Saiáns e Corrigatos, por último, mellorarán a súa estética e acceso cunha completa roza exterior, a renovación das súas vellas varandas metálicas e outras pequenas melloras.