Ibai, Luceira e Lula regresan ao seu medio natural
Por Oskar Viéitez
Ibai, Luceira e Lula son as tres tartarugas mariñas que foron liberadas na tarde deste martes no mar unha vez completada a súa recuperación no Instituto Galego de Formación en Acuicultura (Igafa).
Alí estiveron ingresadas nas últimas semanas baixo a supervisión do persoal da Coordinadora para o estudo dos mamíferos mariños (Cemma).
Estes tres exemplares foron embarcados na patrulleira Punta Roncadoira do Servizo de Gardacostas de Galicia, que saíu desde o porto de Vilaxoán, en Vilagarcía de Arousa, para proceder á súa solta na boca da ría.
Ibai, Luceira e Lula foron rescatadas por tres barcos pesqueiros fronte ás costas galegas.
Máis concretamente, a primeira destas tartarugas foi localizada o pasado 15 de noviembre por un pescador, que a levou ata o porto de Fisterra, onde a bautizaron co nome do seu fillo. Ese mesmo día, o pesqueiro Luceiro uno capturou nas súas redes á tartaruga Luceira, que foi trasladada ata Cedeira para que recibira atención. Por último, Lula apareceu atrapada tamén nas redes dun pesqueiro o 1 de decembro e tras o seu rescate, foi trasladada ata o porto do Barqueiro. Neste caso o nome foi escollido polos fillos do patrón do barco que a localizou.
Unha vez en terra e tras facerlle os exames rutineiros e comprobar que non presentaban feridas graves, decidiuse trasladar ás tartarugas directamente ás instalacións do Igafa onde permaneceron ingresadas para que gañaran peso e garantir a súa total recuperación, antes de devolvelas ao mar.
Baixo a supervisión do persoal da coordinadora, o coidado destes animais nas últimas semanas contou tamén coa participación voluntaria do alumnado e demais persoal do instituto na Illa de Arousa co fin de favorecer a súa progresión. De feito, este tipo de estadías adoitan aproveitarse para formar aos estudantes en aspectos relacionados coa protección dos mamíferos mariños e o fomento da sensibilidade medioambiental.
A vicepresidencia segunda e consellería de Medio Ambiente, Territorio e Vivenda, Ángeles Vázquez asistiu a este acto no que estivo acompañada polo delegado da Xunta en Pontevedra, Agustín Reguera, e pola directora xeral de Patrimonio Natural, Belén do Campo.
Relacionadas:
-
Arou, Bilii e Afortunada volven ao mar, xa sen feridas nin plásticos
Por Redacción |
-
Suárez Costa dá conta ao Consello de Administración do balance de xestión portuaria do 2023
Por Redacción |
-
Piden axuda para identificar este plástico inxerido por unha tartaruga rescatada en Bueu
Por Oskar Viéitez |
-
Máis de 40 exemplares de cetáceos varados a finais de decembro na Ría de Arousa
Por Redacción |