Xerardo Torrado Agulla
A "Feira Franca" sabotea a "Feira Franca"
A razón foi a presenza na zona dunha batucada que montaba un ruido incrible. Quería falar ca xente, pero era imposible, como imposible era afinar mínimamente un instrumento. Estaba alí intentando comunicarme a berros xusto antes de irme. A dita batucada estaba dentro da programación organizada polo Concello de Pontevedra para a "Feira Franca". Non entendo a razón de que o Concello faga unha festa para que a xente coma en amizade, fale, fagan longas sobremesas, toquen instrumentos e canten e bailen cando lles "contraprograma" unha batucada que impide que se poidan facer todas esas cousas. Xa en colaboracións anteriores deixei claro que o fenómeno da batucada non me gusta nadiña, ademais de ruidosa e molesta non só para unha persoa cunha lesión no oído que lle provoca unha brutal hiperacusia, senón incluso para unha persoa sen lesións auditivas, de feito é posible que unha batucada próxima lle cause un trauma acústico que lle ocasio-ne un pitido durante horas ou días e incluso problemas máis graves de longa duración.
A batucada véndese como un espectáculo multicultural, cando de multicultural non ten nada, a súa orixe é brasileira. A batucada chegou a sustituir ós gaiteiros aquí, na "terra da gaita". Nos meus tempos de gaiteiro teño coincidido con eles. Non só precisa dunha formación musical moi inferior a dun grupo de gaitas, de feito non precisa de ninguna, así como de inversión en material: nen instrumentos, que nalgún casos son lixo reutilizado, e non costosas gaitas de buxo ou granadillo, senón que tampouco precisa dun traxe específico coma no caso do grupo de gaitas, xa que cun simple polo e unhas bermudas "van tirando".
Sería comprensible que foran uns molestos espontáneos tocando, pero que dende o Concello saboteen dese xeito á mesma "Feira Franca" non me parece asumible, xa que dita batucada estaban dentro da programación do Concello para ese día.
Non sei, igual por non participar na "Feira Franca" e por preferir un "Centro de Estudos Medievais de Pontevedra" non son a persoa máis adecuada para escribir cómo ten que ser unha "Feira Franca" ou non. Pero creo que o da batucada foi algo moi desacertado e máis ca unha axuda foi un impedimento para facer o que a xente estivo agardando todo un ano para facer. Non só era molesta, falta de estética, ausente de valor musical ou cultural, senón que na Idade Media paréceme que non había batucadas, había frautas, gaitas, zanfonas, e todos eses instrumentos que por culpa do estruendo da batucada foron desprazados, ate desaparecer, como no caso das miñas frautas, que desapareceron xunta comigo. Schopenhauer adoitaba tocala frauta cando precisaba de ordea-la súa mente, e eu fago coma el, teño unha grande admiración polo sabio de Danzig, pero xa tocaba a frauta antes de ler a Schopenhauer. A música, a Historia, a literatura e a filosofía fan que cada día decida vivir un día máis, quero disfrutar máis de todo iso, de máis concertos, de máis libros, de máis argumentos para converter ós idiotas en individuos razoables, do que non quero saber nada é de espectáculos ruidosos e faltos de toda estética que por riba sabotean calqueira intento de falar amigablemente ca xente e de pasalo ben. A "Feira Franca" non pode durar moito se ela mesma se sabotea dese xeito a si mesma. Tirón de forellas para quen o fixo, agora, para redimirse, que monte un "Centro de Estudos Medievais de Pontevedra", os/as investigadores/as lle estaremos moi agradecidos, e a cidadanía tamén. A Historia ten un papel na sociedade máis aló de entreter, sobre todo debido a que os que escriben historia para entreter tan sequera son historiadores.