![Andrés Núñez Rajoy](/web/cache/scene/uploads/xornalistas/foto/aa1/_S7QytKoutjK3UsovKMnMzytWsi62MjSxUqrKz891Lsov0DE1AC_/_Il61oA_/6441659426-foto_anr.jpg)
Andrés Núñez Rajoy
Loiadas, anonimatos, idiotas e outros perigos da democracia
Gústame o termo loiada que a RAG define como: s.f. 1 Aquilo que unha persoa presenta como verdadeiro sabendo que é falso. 2 Noticia falsa que se difunde co fin de facer crer que algo falso é verdadeiro, xeralmente con algún fin. Ten como sinónimos a embuste, loia, mentira e trola. Non é outra cousa que o que acotío lle din "bulo" ou en inglés "fake news". Preocúpame o aumento de loiadas nas redes. Unha persoa baixo un alcume, que se pon ela mesma, solta unha loiada polas redes, sabendo que o é, os seus seareiros espállana e coméntana. Contado así parece que é unha cousa simple, que é duns poucos. Pero as cousas non son como parecen. Cando se poñen a falar de política e poñer noticias falsas ponse en perigo a democracia. Vemos casos de odio ao distinto. Casos de racismo, de xenofobia. Casos de retorcer a verdade para facer pasar a mentira por verdade. A extrema dereita atopou un bo sistema para conseguir desestabilización. Coa boca pequena todo o mundo di estar en contra mais logo o seu comportamento di todo o contrario. Para que todo isto sexa aceptado polos seareiros idiotas antes hai que preparar o caldo. Vese claro na actuación de determinados medios, determinadas empresas ou determinados políticos de dereita. Vexo en La Voz de Galicia unha obsesión ca ocupación de pisos. Converte un problema puntual, e amolado para os donos, nun problema global, como se nos foran a ocuparnos os pisos a todos. Se saíra unha noticia cada día do ano serían 365 ocupacións, cousas que non pasa. En Galicia hai máis de 1.700.000 casas e pisos. Esta claro que a taxa de ocupación é pequena. O que se fai é crear un problema onde non o hai. O mesmo pasa con compañías de seguros que agora anuncian seguros de vivenda no que engaden tamén a ocupación. É o exemplo claro que o problema, aínda que se dá nalgúns casos non é tan grave, xa que as compañías de seguros son parvas e o de perder cartos non vai con elas, teñen moi ben estudado que o risco é mínimo. O problema máis importante é cando os responsables dun partido que presume ser de "orde" e de goberno como o PP, por comenencia de votos lle compra a mensaxe á extrema dereita como son as últimas palabras de Feijóo sobre os menores inmigrantes ligándoos á delincuencia.
Nunca me fiei da extrema dereita. Nunca confiei que ía a desaparecer completamente nin os Guerrilleros de Cristo Rey nin Fuerza Nueva. Vin como os seus sen integraban, en democracia, no franquismo sociolóxico de Manuel Fraga como foi o caso de Fernández de Mesa, ou ao o mundo do fútbol como Del Nido ou Tebas. Agora, por ser tan mol a dereita, aparecen as fornadas da extrema dereita que conseguiron levar a Europa tres eurodeputados e 800.000 votos. O máis difícil é comprender como alguén lle pode votar a unha persoa a parte de escribir loiada día si, día tamén, non sexa capaz de ver cousas que son imposibles de crer, só fai falla mirar ao redor, non fai falla pensar. Hai un resumo moi ben feito por Jesús Cintora nun dos seus informes que publica regularmente e Youtube, este titúlase "De locos, fachosfera desatada. Alvise incluido…" (https://www.youtube.com/watch?v=q6ckgKl3MK4), aí podemos ver como din que en España hai decapitacións. Tamén soltan, e quedan tan tranquilos , que pronto imos quedar sen españois (?). E o tan repetido de que España se rompe (aquí tamén coinciden co PP). Claro que para poder seguir, e crer o que din hai que ser moi idiota. Volvo ao dicionario da RAG, Idiota: Que ten ou demostra moi pouca intelixencia, que se deixa enganar facilmente ou que non sabe sacar proveito dunha situación. Sinónimos estúpido, imbécil. Non é tan idiota como para non entendelo. Sinónimos babeco, babiolo, bobo, boubexo, boubo, cretino, imbécil, panoco, paparón, parvo, sandeu. Toda unha morea de nomes cos que designar a esta xente. Ao final acabo pensando que esta xentiña que lle da o apoio a estes grupos é como a xente que coñecín nos anos 60 e que padecían enfermidades culturais. Tiñan o mal de ollo, vían á Santa Compaña, estaban posuídos polo demo ou tiñan medo do Porviso. Co tempo e o coñecemento estas crenzas foron desaparecendo. A estas novas enfermidades baseadas na mentira e no anonimato xunto cos idiotas e cretinos que as sustentan só as podemos combater con máis democracia, e con cordóns sanitarios (aínda que non lle guste a Feijóo).
Mais todas estas desinformacións teñen padriño. Fai quince días Elon Musk fixo unha entervista mitin a Donald Trump, na súa plataforma X (ex Twiter). Loiadas e máis loiadas. Twiter converteuse (convertémolo) nun lugar que parecía que ía ser para expresar as opinións, para a difusión de información. Acabou sendo a plataforma onde as empresas e as institucións nos comunican o que consideran do noso interese. Cando a mercou o dono de Tesla as cousas cambiaron, Musk converteu a plataforma no altofalante de extrema dereita e declarouse "absolutista da liberdade de expresión". Le Monde nun artigo no que falaba que en dous anos fixo da plataforma un instrumento de poder ao servizo das súas ideas, e titulaba "Elon Musk, actor político da extrema dereita".Fixo unha amnistía e chamou aos expulsados de Twiter para que volveran, comezando polos que asaltaron o Capitalio con Trump ao fronte e a organización fascista Liga de Defensa Inglesa. Agora Trump xa pode dicir na plataforma que Kamala Harris ata agora non era negra. Nos recentes disturbios no Reino Unido Elon Musk escribeu na súa plataforma: "a guerra civil é inevitable", insultando a Keir Starmer. É prepotente e métese con que lle quere parar os pés, a Trudeau comparouno con Hitler. A Thierry Breton, comisario responsable da tecnoloxía dixital e que lle lembrou a Musk da necesidade de que X respecte as normas do Regulamento sobre servizos dixitais onde se regula a moderación de contidos, o Digital Services Act (DSA) respondeulle cun "meme" insultante baseado na película Tropic Thunder.A comisión Europea acomplexada e submisa cos EEUU, coa desculpa de non meterse nas eleccións americanas, reprendeu ao comisario a portavoz dixo: "O momento e a redacción da carta non foron coordinados nin acordados coa presidenta (Ursula von der Leyen), nin co resto de comisarios". O periódico francés Le Monde, nun artigo de Damien Leloup, titula: "Por que Elon Musk parece intocable?( Pourquoi Elon Musk semble intouchable?). Elon Musk marca a ruta e favorece a ruta as desinformacións, mesmo xogando con enfrontamentos civís.
Este xeito de facer as cousas só pode ser crido polos idiotas e cretinos porque só os babecos, babiolos, bobos, boubexos, boubos, cretinos, imbéciles, panocos, paparóns, parvos e sandeus son capaces de ir contra os seus intereses. O amigo Antón, falando disto diante dunha chiquita de Ribeiro, dime que si xuntamos as desinformacións das plataformas, as opinións anónimas, os insultos e mentiras que conta a Ayuso (cando lle convén) nas radios televisións e xornais, cas contradicións do PP e de Feijóo, iso acaba afectándolle a xente no cerebro e crea idiotas. E o problema da democracia, segue Antón, é que os idiotas teñan poder.
E todo isto, pregunto eu, ten arranxo? Penso que si, si se quere, porque si o tratamos como unha enfermidade cultural dos anos 60, non hai Virxe do Corpiño que quite tanto meigallo do corpo.