Iago Paz chega a un acordo co Pontevedra para rescindir o seu contrato
Por Redacción
Iago Paz abandona a disciplina do Pontevedra. A primeira hora da tarde deste xoves chegou a un acordo cos responsables do club para rescindir o seu contrato. Faino catro meses logo de quedar sen ficha ao verse obrigado a deixar a súa praza no equipo a Pablo Carnero, contratado coa liga xa comezada.
Segundo puido saber PontevedraViva, o canteirán granate cobrará todas as cantidades que se lle deben, aínda que se lle pagará en tres prazos. Ademais, Iago Paz comprométese a retirar a denuncia que presentara ante a Inspección de Traballo e Seguridade Social ante a súa situación laboral. O Pontevedra quería pagarlle só ata a data da súa baixa e chegou a apartarlle dos adestramentos co equipo como media de presión.
Resoltas estas diferenzas, Iago Paz intentará buscar un novo equipo no que continuar a súa carreira profesional. O propio futbolista recoñece que "ahora que tengo la carta de libertad empezaré a mirar". Asegura que chegou a ter varias opcións encima da mesa, que non quixo estudar ata resolver a súa situación co Pontevedra, "pero ahora mismo no tengo nada".
Nun escueto comunicado, o Pontevedra asegurou que agradece ao futbolista os servizos que prestou durante a súa etapa como xogador granate e deséxanlle sorte no seu futuro profesional.