Galicia fai historia e proclámase campioa de Europa tras tombar a Belgrado (3-1)
Por Almu Dapena
O estadio da Lomba viviu este sábado unha auténtica festa do fútbol coa proclamación de Galicia como nova campioa das Rexións UEFA ao gañar a Belgrado.
Ante máis de tres mil persoas animando o equipo de Iván Cancela non podía fallar e, fiel ao seu estilo, atopou moi rápido o gol. Iñaki partiu de banda dereita, meteuse cara a dentro e enviou un pase a Félix, que controlou de peito, deixou atrás a Bojovic e anotou a porta baleira.
Con confianza tras o 1-0, os locais seguiron facendo o seu xogo, mentres Belgrado tiña no ecuador do primeiro tempo a ocasión máis clara por medio de Uros Pavlovic, que disparou desde os trinta metros e obrigou a Ramón a despexar de puños.
Con todo, cando parecía que os serbios se empezaban a entoar, chegou o segundo para Galicia. Álex Rey probou desde fóra da área, o balón deu na man de Krstović, penalti e segunda amarela. O propio Álex Rey marcou o 2-0.
Antes do descanso, Kolarevic puido recortar distancias para os seus, pero Ramón salvou co pé.
Despois do paso polos vestiarios o dominio continuou sendo galego, pero co paso dos minutos foi decaendo e Belgrado, a pesar de estar cun xogador menos, gozou das mellores ocasións do encontro. Jesús Varela salvaba o 2-1 lanzandose providencial, pero no 57 chegou o premio cun disparo axustado abaixo de Kolarevic.
Era precisamente o mozo xogador serbio o que estaba a causar maiores problemas ao equipo de Iván Cancela e volvía poñer en aprietos a Ramón, obrigado a intervir para deter outro remate.
Envorcados arriba en busca do empate, Belgrado abriu espazos e Galicia aproveitounos para ter unha gran opción para facer o terceiro gol. Adri Otero asistiu a Iñaki, pero o seu chute foise por encima do traveseiro.
Adri Otero volveu ser protagonista ao estrelar o seu remate no poste e, xa no 73, chegou o gol da tranquilidade. Ube e Óscar combinaron na dereita, o último centrou ao segundo pau onde Iñaki controlou e non perdoou cun disparo abaixo.
Os serbios estaban xa sen case opcións, o cansazo notábase e Galicia puido mesmo golear, pero a defensa frustrou as intencións. Tamén Belgrado, no 83, tivo a opción de meterse no partido, pero Ramón salvou ao seu equipo para desatar a festa na Lomba unha vez que o colexiado pitou o final do partido.
Relacionadas:
-
Galicia, a un paso de tocar o ceo na Lomba
Por Redacción |
-
Á final! Galicia tomba a Bavaria (1-0) e acariña o título da Copa de Rexións UEFA
Por Diego Espiño |
-
Galicia derrota a Bosnia e xogarase o pase á final da Copa de Rexións UEFA ante Alemaña (2-1)
Por Redacción |
-
Galicia dobrega a Irlanda no seu debut na Fase Final da Copa de Rexións UEFA (2-0)
Por Diego Espiño |