Á final! Galicia tomba a Bavaria (1-0) e acariña o título da Copa de Rexións UEFA
Por Diego Espiño
A Selección Galega de Fútbol Afeccionado clasificouse para a gran final da Copa de Rexións UEFA, cuxa fase decisiva está a disputarse estes días nas Rías Baixas.
O combinado autonómico chegaba este mércores á última xornada de grupos con dous triunfos en dous encontros, e sabendo que se gañaba o seu gran rival, o equipo alemán de Bavaria, lograría o billete para o partido definitivo polo título.
Nun estadio da Lomba, en Vilagarcía, que presentou un gran ambiente nas bancadas, aos pupilos adestrados por Iván Cancela púxoselles moi pronto de fronte o choque. Transcorreran só cinco minutos de xogo cando Álex Rey internábase na área e era derrubado claramente polo defensor visitante Valentin Stoner. O colexiado non dubidaba e sinalaba o punto de penalti, desde onde o propio Rey batía ao porteiro alemán para poñer o 1-0.
Descanso na Lomba
— En Xogo tvG2 (@EnXogo_tvG2) June 14, 2023
GALICIA 1-0 Baviera
Marcou Álex Rey (m7) o gol que, de momento, mete a Galicia na final da Copa das Rexións da @UEFAcom_es
Vémolo na G2 e https://t.co/pE2Xnwpb1R pic.twitter.com/VhbX7iYIMh
O máis complicado estaba feito, pero faltaba un mundo por diante para reter o botín. A intensidade de feito non decaeu, e pelexábase por cada balón.
Controlando o resultado Galicia esperaba a súa oportunidade para tentar despegarse no marcador, aínda que a ocasión máis clara ata o descanso foi para Bavaria pasada a media hora nunha falta lateral rematada de cabeza e despexada polo gardameta Ramón a córner cunha bonita estirada.
O porteiro galego volveu ter protagonismo tras o paso por vestiarios, ao deter un disparo de Kosuch, pero o cronómetro seguía descontando o tempo sen que se producisen cambios.
No minuto 70 Kopa tivo tamén nos seus pés o segundo da Selección Galega. A súa volea cruzada marchou fóra por pouco.
Chegábase así aos minutos decisivos, nos que os de Iván Cancela souberon sufrir para amarrar a vitoria e o pase á gran final do próximo sábado 17 de xuño (19.00 horas, A Lomba) ante Belgrado.
Galicia está xa a só un paso de facer historia.
Relacionadas:
-
Galicia fai historia e proclámase campioa de Europa tras tombar a Belgrado (3-1)
Por Almu Dapena |
-
Galicia, a un paso de tocar o ceo na Lomba
Por Redacción |
-
Galicia derrota a Bosnia e xogarase o pase á final da Copa de Rexións UEFA ante Alemaña (2-1)
Por Redacción |
-
Galicia dobrega a Irlanda no seu debut na Fase Final da Copa de Rexións UEFA (2-0)
Por Diego Espiño |
-
Galicia xa traballa sobre o céspede pensando no seu debut na Fase Final da Copa de Rexións UEFA
Por Redacción |
-
Presentada a Fase Final da Copa das Rexións UEFA que se xogará nas Rías Baixas do 9 ao 17 de xuño
Por Diego Espiño |
-
Baltar, A Lomba, Burgáns e A Senra póñense a punto para acoller a Copa de Rexións UEFA
Por Redacción |