Antía Jácome estará, por partida dobre, na pelexa polas medallas do Campionato do Mundo Sprint de Piragüismo que se está celebrando en Dinamarca.

A padexeira da  EP Ciudad de Pontevedra debutou o xoves cun terceiro posto na súa serie do C-2 500, que defende coa marinense Antía Otero, que lle daba o pase directo á final, e este venres repetiu o trámite no C-1 200 metros, proba na que conseguiu diploma olímpico en Tokyo, ao ser segunda na súa eliminatoria.

Jácome e Otero pelexarán polos primeiros postos na final do C-2 500 este sábado, ás 11.09 horas da mañá, mentres que a proba individual de canoa de 200 metros disputarase o domingo ás 11.03 horas.

Tamén pasaron á final no C-2 1.000 metros Noel Domínguez (Breogán do Grove) remando finalmente con Manuel Fontán (Náutico O Muíño) grazas ao terceiro posto na súa eliminatoria. No seu caso a final, todo un premio, está fixada para as 12.26 horas do sábado.

Fontán avanzou á súa vez ata as semifinais do C-1 500 metros.

Tivo que acudir tamén á semifinal Carolina García (EP Ciudad de Pontevedra) xunto a Sara Ouzande no K-2 500 metros, pero o seu quinto posto impediulles meterse na final A e por tanto na loita polas medallas.

Por último Adrián Sieiro (Piragüismo Poio Pescamar) competirá tamén este sábado na distancia de  C-4 500 metros (12.48 horas).