É a recta final. Xa só quedan uns días para que a expedición española parta rumbo aos Xogos de Tokyo nos voos organizados polo Comité Olímpico Español (COE). O primeiro deles farao o próximo 9 de xullo de feito.

Por ese motivo Javier Gómez Noya intensificou a súa preparación nos últimos días coa segunda das concentracións previstas na illa mexicana de Cozumel, lugar elixido polo seu equipo para adaptarse á calor e a humidade que se espera para a competición olímpica.

Se na primeira o pentacampión mundial en distancia olímpica contou con compañeiros de adestramento como a pontevedresa Saleta Castro xunto a David Castro, Víctor Benages e Anneke Jenkins, agora volveu tirar doutro deportista pontevedrés para afinar unha especialidade que pode resultar decisiva, a carreira a pé.

Trátase do marinense Víctor Riobó, con quen adoita exercitarse nas súas estancias na  Boa Vila e ao que se levou nesta ocasión ata Cozumel para tentar lograr a chispa necesaria no último sector coa axuda de todo un especialista como o atleta da Sociedad Gimnástica.

Están a ser "días de traballo duro", recoñeceu a través das súas redes sociais o propio Gómez Noya. Todo para chegar na mellor forma posible ao luns 26 de xullo, data prevista da carreira masculina en Tokyo na que buscará a súa segunda medalla olímpica. Será ademais a súa única cita nos Xogos, xa que finalmente serán Mario Mola e Fernando Alarza os que competirán xunto a Miriam Casa e Anna Godoy na carreira de remudas mixta.

 

 

 

 

Ver esta publicación en Instagram

 

 

 

 

 

 

 

 

 

 

 

Una publicación compartida de Javier Gómez Noya (@jgomeznoya)