José Moreira: "Sei o que pode pedir Nando e el sabe o que eu podo dar, é unha sintonía que me axudou a aceptar a oferta"
Por Diego Espiño
Chegou a Pontevedra, asinou e xa puido gozar duns minutos no partido ante o Lugo presentándose ante os afeccionados granates.
Un día despois José Antonio Moreira estreouse ante os medios de comunicación na sala de prensa do Estadio Municipal de Pasarón aceptando o reto de pelexar polo ascenso e ilusionado ante a nova etapa deportiva que acaba de comezar: "cando te chama un club con este organigrama, con este estadio e coa historia que ten este club non cho podes pensar moitas veces".
José Moreira: "a Terceira galega é moi difícil, vas a calquera campo e todo o mundo che pode facer dano"
O centrocampista, que asina por un ano, confirmou que a presenza de Nando, con quen coincidiu no Cerceda, foi un dos puntos determinantes para recalar en Pasarón: "Nando ten confianza en min, coñéceme, estiven case unha tempada enteira con el, ademais loitando polos mesmos obxectivos que o Pontevedra, o ascenso, e eu sei o que pode pedir Nando e el sabe o que eu podo dar, é unha sintonía que me axudou a aceptar a oferta".
Moreira non obstante lanzou unha mensaxe de cautela asegurando que a tempada non será un camiño de rosas a pesar dos ascensos de Racing de Ferrol, Compostela e Celta B: "aínda que parece que a Terceira baixou de nivel este ano cos ascensos pero a Terceira galega é moi difícil, vas a calquera campo e todo o mundo che pode facer dano".