Toño Fernández abandona o Teucro "por motivos persoais"
Por Diego Espiño
A Sociedad Deportiva Teucro queda sen o seu capitán. Toño Fernández decidiu abandonar a disciplina azul "despois de 20 anos" nunha decisión que asegura, non se basea en criterios económicos ou en desencontros co club: "non abandono porque teña outra oferta ou porque non acepte a proposta do clube, son motivos persoais, marcho a traballar á zona da Coruña buscando estabilidade laboral".
O extremo despediuse arroupado por boa parte dos seus compañeiros e dedicando palabras de agradecemento a directivos, afeccionados e persoal da entidade.
Toño non se retira, asegura que buscará un equipo pola zona norte para seguir gozando dun deporte "ao que lle debo a vida", pero sen esquecerse dun Teucro ao que, di, seguirá animando, "eu empecei con Elisa animando coa peña Blue Ones e iso me axudou a entender o amor que hai que ter por este equipo, este club ten que volver ir para arriba, quero volver a veros en Asobal".
Toño Fernández: "Este club ten que volver ir para arriba, quero volver a veros en Asobal"
Despois da saída de Toño Fernández nas próximas horas coñecerase tamén a decisión de José Manuel Rial, que estuda a oferta presentada por xunta directiva.
Ata o momento oito son os xogadores que seguirán ás ordes de Javier Barrios: David Chapela, Tomás Moreira, Borja Pedreira, Carlos García, Miguel Porto, Álex Pombo, Carlos Pombo e Juan Bar. Por decidir queda o futuro de Miguel Sío, César Armán, Didac Villar e o do xa citado José Manuel Rial, ao que hai que sumar as baixas de Siscu e Gonzalo García Alén.