Acción Granate bota a andar co respaldo de Alberto Argibay que confirma o seu interese en liderar o Pontevedra
Por Ramiro Espiño
Cunha rolda de prensa nas instalacións do Casino Mercantil, presentouse na mañá do sábado a Plataforma de accionistas minoritarios do Pontevedra C.F., presidida por José Antonio Millán e con José Iglesias como vicepresidente. No acto contaron coa presenza do que fose adestrador, Alberto Argibay, que confirmou a noticia adiantada por PontevedraViva, manifestando a súa intención de optar a dirixir o club, a través dun proxecto, bautizado como 'Acción Granate 50 +1' que será presentado a toda a afección o próximo martes, día 18 de xuño, no Pazo da Cultura.
Os dirixentes do colectivo de afeccionados e accionistas deixaron claro que foron eles os que pediron a Argibay a súa implicación para intentar reconducir a situación no que se encontra o Pontevedra, porque entenden que o club necesita un cambio urxente.
Pola súa banda o ex-técnico, a xeito de avance do proxecto que ten ultimado, indicou que o obxectivo é sacar o Pontevedra da Terceira División de modo inmediato e levalo a unha categoría profesional como a Segunda División no prazo de cinco anos.
Previamente, durante toda a mañá do sábado, Acción Granate fixo campaña de captación de seguidores nun Posto instalado na Praza da Peregrina, informando os pontevedreses dos obxectivos do colectivo e logrando no prazo de tres horas que se afiliasen ao mesmo 340 afeccionados.
Na rolda de prensa, José Iglesias explicaba os motivos que os levaron a constituír a plataforma: "Cremos que o club necesita un cambio de xestión e un cambio deportivo, porque hai tres anos estabamos en Segunda B e agora estamos en Terceira, cun proxecto o primeiro ano que se nos vendeu como que era para o ascenso e nos clasificamos no último momento e con apuros. O segundo ano, vostedes xa saben, quinto posto, a peor clasificación da historia do club. Séguennos vendendo un proxecto de canteira, un proxecto de futuro e non o vemos. Cremos que se pode facer outra xestión, tanto económica, coma social e deportiva, porque coa actual nós cremos que non hai futuro".
Pola súa banda José Antonio Millán manifestou: "No social debo dicir que os actuais xestores non teñen a culpa da herdanza que lles deixaron outros, pero a pregunta é como conseguiron tanto rexeitamento cara a eles en tan pouco tempo. ÿ preocupante. O socio, aboado, pequeno accionista non ten ningún poder no club, ningunea se lle constantemente. A política que se segue, en todos os aspectos, é desastrosa. O Club, ben levado, ben organizado, ten moito potencial pero non se sabe explotar. Deportivamente encontrámonos coa peor clasificación da historia e véndese un proxecto de canteira que non sei onde está, porque as pequenas xoias que podemos ter están a marchar este ano, por algo será. Fálase de austeridade e gustaríame saber canto se destina ao staff técnico, dende o director deportivo que están a anunciar, ata o adestrador de cadetes, canto diñeiro gasta nos técnicos e canto en xogadores ou en tratar de manter ás nosas perlas habería que preguntarse, por que Javi Pazos marcha".
Millán continuou: "Acción é a unión de todos os peñistas, ou case todos que estabamos en Granavedra e de moitas persoas vinculadas ao club para ir nunha única dirección. Contamos co respaldo de moitas persoas. Nos temos posto en contacto con Alberto Argibay porque entendemos que nós non somos os que, nin capaces para gobernar un club ou de meternos en cousas que se escapan ao noso coñecemento, por iso recorremos a profesionais, como o é Alberto, profesionais como el que ademais queiran ao Pontevedra, para que nos asesorase e axudase a crear un proxecto deportivo viable que poida darlle un aire novo ao Pontevedra".
Para finalizar tomou a palabra Alberto Argibay, quen dixo: "Dende o primeiro día que Acción Granate se me dirixiu entendín perfectamente cal é o sentimento. O Pontevedra é unha sociedade anónima, pero o fútbol non ten ningún sentido se non hai sentimento. Por formar parte do cadro técnico do Pontevedra entendo perfectamente que é o que demanda a afección, esta xente nova que cruzou España moitas veces para acompañarnos. ÿ o momento de xerar un cambio, que ten que nacer precisamente do afeccionado que historicamente é o que mantivo o club".
"O Pontevedra hoxe está nunha categoría que, en definitiva é afeccionada, que non lle corresponde. Hai que ter a humildade de asumilo, pero sabendo que se lle pode dar a volta, para iso fai falta un modelo, unha liña de traballo que non hai agora mesmo. O día 18 imos presentar un proxecto baixo o nome de 'Acción Granate 50 +1', que o primeiro que busca é que a xente se implique no cambio. A razón deste nome é porque estes problemas que hoxe vive o Pontevedra os viviron outros clubs e noutros países, en concreto no fútbol alemán, onde o propio goberno creou unha lei con ese nome para que os afeccionados recuperasen o control dos clubs, que é xusto o que se perdeu coa conversión en sociedade anónima. O que queremos é que, aínda que haxa un Consello de administración, o afeccionado estea representado, que teña voz executiva, participación e información".
"Agora mesmo o Pontevedra non ten un proxecto, fundamentalmente porque non ten un liderado claro que ten que nacer do Consello e que non existe. Logo ten que haber planificación, que tampouco a hai, porque se dis que queres facer un traballo de canteira e resulta que o equipo máis importante da canteira, que é o xuvenil, non ten nin sequera un técnico titulado, que tivo que pedir un título prestado. E logo estabilidade, non andar cambiando 20 xogadores cada ano, que é xusto o que está a pasar, porque os mellores xogadores deste ano en realidade están no mercado, porque non foron capaces de renovalos durante o ano. A Fran Rico, por exemplo, cando o subimos ao primeiro equipo fíxoselle un contrato profesional por 5 anos, co que o club protexía e logo obtivo o seu froito, non obstante estamos a ver que con Javi Pazos o club quedou desprotexido e pérdelo sen constraprestación para o club".
'Acción Granate 50 +1' é o nome do proxecto que pretende levar o Pontevedra a Segunda División en cinco anos
"Logo hai que definir claramente os obxectivos e pelexar por eles ata o final. No proxecto que imos presentar o día 18 o noso obxectivo é que o Pontevedra, a cinco anos vista, poida chegar a unha categoría profesional como a Segunda División. Ademais, á parte do Consello de Administración no que os accionistas minoritarios terán representación, crearemos unha Comisión de Control da xestión que vixíe que dende o Consello se traballe non só para uns poucos, se non para todas as persoas que forman a sociedade. Hai moita xente disposta a axudar ao club de forma voluntaria e iso é o que queremos transmitir, que o faremos dunha forma altruísta".
Para rematar, Alberto Argibay pediu imparcialidade aos medios de comunicación e retou os membros do actual Consello a un debate público: "Pediría aos medios que estades aquí presentes, neutralidade, porque é importante que a mensaxe chegue ao público. Non somos un grupo de soñadores, somos un grupo de xente que quere ao club e queremos axudar a que se produza un cambio. Propoñemos para rematar un debate público coa xente que forma o actual Consello para falar do futuro do Pontevedra, do proxecto que teñen eles e que equipo vai lideralo. Nós temos un equipo e un proxecto e estamos dispostos a debatelo con eles. Non pode haber esta separación que hai actualmente entre o Consello e os accionistas minoritarios ou afeccionados".