O Voleibol Pontevedra prolonga o seu bo momento e colócase sexto
Por Redacción
Non hai quen pare ao Club Voleibol Pontevedra na Primeira División Galega.
As pontevedresas sumaron a fin de semana o seu cuarto triunfo consecutivo en liga e proseguen a súa escalada na clasificación alcanzando a sexta praza e pensando en continuar coa súa recuperación para os play-off polo título autonomíco.
Nesta ocasión o CVP Alianza Española de Seguros enfrontábase na casa ao Xuvenil de Teis, quinto clasificado, e demostrou o seu gran estado de forma cunha vitoria incontestable por 3 sets a 0.
O conxunto local levou a primeira manga por un apertado 26-24, e a partir de aí dominaron desde a efectividade nas accións ofensivas para pechar o duelo cun 25-11 e un 25-6.
A próxima xornada de liga disputarase a fin de semana do 23 de febreiro, co Club Voleibol Pontevedra visitando o Santiago Bruxas, líder da competición e claro favorito al título. Toda unha proba de nivel que medirá a súa reacción nas últimas semanas.