Iván Martínez, ciclista do Super Froiz, faise co triunfo na Volta a Ávila
Por Redacción
Triunfo para o Super Froiz en terras abulenses. O corredor Iván Martínez gañou a XLV edición da Volta Ciclista a Ávila para corredores elite e sub 23, disputada en dúas etapas ao longo desta fin de semana.
Martínez logrou subir ao máis alto de podio tras o seu triunfo na segunda etapa, de 139,3 quilómetros, entre Navalacruz e Navarrevisca.
Toda a etapa foi controlada polo equipo pontevedrés. Foi no porto de Mijares, o último que subía o pelotón, onde Iván Martínez deu un golpe de pedal que deixou cravado a todos os seus rivais. Logrou chegar en solitario á meta, con 23 segundos de vantaxe con respecto ao segundo clasificado, Sebastián Mora (GSport).
Con este resultado, o corredor do Super Froiz, que fora cuarto na primeira etapa -con saída e chegada en El Tiemblo-, superou na clasificación xeral a Anatoli Budiak (ULB) por 26 segundos e a Gabriel Pons (Escribano) por 29 segundos.
O seu compañeiro de equipo Miguel Gómez logrou finalizar en undécima posición e, ademais, foi segundo na clasificación da montaña.
Ademais, Iván Martínez levou a camisola da xeral por puntos e o Super Froiz foi o mellor equipo da carreira, con cinco minutos de vantaxe sobre o Mutua Levante Bioracer.