Alberto Pedreira e Lucía Vázquez, campións galegos de cross country olímpico en Samieira
Por Redacción & Diego Torrado
Samieira viviu un sábado de grandes emocións no ámbito da mountain bike. Nesta parroqua da localidade pontevedresa de Poio celebrábase o campionato galego de cross country olímpico (XCO), una cita deportiva que non defraudou a ninguén.
Nela, Alberto Pedreira (Bici Verde) e Lucía Vázquez (Maiatos/Reabnorte) foron os gañadores nas probas raíñas e o Academia Postal-Actyon-Maceda o gran triunfador nas categorías inferiores con catro vitorias, incluído un triplete en junior.
O circuíto polos montes de Samieira e a ruta dos muíños tiña unha lonxitude de cinco kilómetros, os tres primeiros eran de subida para despois entrar nunha zona cha e rematar cun descenso na súa chegada a meta. A proba reuniu a un total de 127 participantes.
Na carreira Elite e Sub23 producíronse varias incidencias, unha delas de carácter grave. Manuel Parada (VI 3) sufriu unha caída na que se rompeu cúbito e radio, Saúl López (Club Ciclista Maceda), outros dos favoritos á vitoria, viuse afectado por unha avaría e Samuel González (Óscar Pereiro) polas cambras.
Alberto Pedreira non desaproveitou estas circunstancias para ratificar o seu gran momento de forma e o actual líder do Open Galicia de XCO impúxose cun tempo de 1:24:56. En segunda posición a liña de meta chegou Marcos Villar (Maceda) detendo o reloxo en 1:27:20. A terceira praza foi para Saúl López, a case tres minutos e medio do gañador.
O podio Elite completouno Darío Otero (Compostelano), mentres que Villar estivo escoltado en Sub23 por Adrian Valverde (Club Ciclista Rías Baixas) e Raúl González (Academia Postal).
Máis igualada estivo a pugna en féminas entre a gran favorita e a actual líder do Open de Galicia XCO. Lucía Vázquez cumpriu cos prognósticos e conseguiu a súa undécima coroa galega en Elite. A vilaboense completou a carreira en 1:25:01, avantaxando en 50 segundos a Lara Lois (C. C. O Grove). O terceiro posto ocupouno Desiree Duarte (Bioracer), a máis de 13 minutos da primeira clasificada.
Os corredores do Academia Postal-Actyon-Maceda monopolizaron o podio na competición junior masculina. Iván Feijoo venceu por diante dos seus compañeiros de equipo Abel Franco e Román Saa. O club ourensán tamén dominou noutras dúas categorías. Carlos Canal superou a Adrián Barros (Coruxo) e a Eloy Espiñeira (Caimanes de Betanzos) en cadete masculino e Antía Martínez a Marta Vila (Fornelos) e Andrea García (Cambre) en féminas cadete.
Outra das triunfadoras da xornada foi Irene Trabazo. Na súa primeira participación desta temporada en XCO adxudicouse a vitoria por diante de Sara Trigo (Óscar Pereiro), líder do Open de Galicia. O terceiro posto foi para Carlota Cañamero (Coruxo).
Nas catro carreiras de masters ningún club repetiu triunfo. Alejandro Mesías (Cambre) en Master-30, Manuel Armada en Master-40, Óscar Lorenzo (Bici Verde) en Master-50 e Silvia Deira (Os Aforcados) en Master féminas foron os gañadores.
Relacionadas:
-
O Open Galicia de BTT volve a Poio catro anos despois
Por Diego Espiño |
-
Lucía Vázquez revalida título en Portugal
Por Redacción |
-
"Ganar en casa tiene que ser la leche", asegura Lucía Vázquez ante o Nacional de BTT
Por Redacción |
-
Lucía Vázquez, en plena forma antes de afrontar o Campionato de España
Por Redacción |
-
Trescentos ciclistas participan na segunda edición do MiniBTT de Campelo
Por Alejandro Espiño & Diego Torrado |
-
Poio, capital do BTT galego esta fin de semana con probas en Samieira e Campelo
Por Alejandro Espiño |