O Waterpolo Pontevedra, campión da Copa Galega
Por Redacción
Novo éxito deportivo do Club Waterpolo Pontevedra. Tras o seu bo papel en liga, os pontevedreses proclamáronse o pasado sábado campións da Copa Galega Absoluta, nun torneo disputado na piscina Rosario Dueñas de Ourense.
O CW Pontevedra disputou os cuartos de final fronte ao RCN Vigo. Ante este rival, decidiron reservar a varios titulares e os técnicos confiaron nos xogadores xuvenís, que non defraudaron e lograron unha cómoda vitoria por 1-8.
Tras unha hora e media de descanso, mentres se xogaba a primeira semifinal entre CN Coruña e CW Pavillón Ourense con resultado de 15-4, os do Lérez volvían saltar á auga para xogar a semifinal fronte ao CW Santiago.
Como era de esperar, foi un partido moi igualado e emocionante. A pesar de que o CW Pontevedra comezou o partido con bo pé, gañando o primeiro cuarto 1-2 e chegando 1-4 ao ecuador do partido, tras poñerse 1-5 no terceiro período os pontevedreses nubláronse.
Numerosas precipitacións e mala puntería con paus e paradas do porteiro santiagués, fixeron que o CW Santiago volvese meter no partido ao final do terceiro cuarto cun marcador de 5-6. A cousa empeorou para os das Rías Baixas, pois o CW Santiago lograba dar a volta ao marcador cun 7-6 ao seu favor a falta de 3 minutos. Pero dous erros do seu rival permitiron que o partido concluíse con 7-8 a favor dos pontevedreses.
Con só vinte minutos para recuperarse deste intenso partido e cos mesmos xogadores, o CW Pontevedra preparábase para afrontar a súa sexta final de Copa consecutiva, onde o factor físico sería a crave fronte ao campión de Liga, o CN Coruña.
O CW Pontevedra non comezou ben o partido, cun mal primeiro cuarto sen acerto para portería. A final complicábase chegando ao ecuador do encontro cun 3-1 para os coruñeses, que aguantaban con vantaxe ata chegar ao último cuarto cun 4-3 favorable.
Foi no último período onde os pontevedreses tiraron de oficio e onde sacaron a relucir a súa mellor condición física. Un parcial de 0-4 rompía o partido cun 4-7 a falta de 2:36, aínda que esta vantaxe non foi suficiente para gañar con comodidade, pois a mocidade dos pontevedreses fixo que algunhas precipitacións nestes dous minutos e medio perigase a vitoria con dous goles do CN Coruña, acabando co 6-7 final.
Estes tres triunfos na mesma tarde deron ao CW o seu terceiro título de Copa Galega.
Relacionadas:
-
O campionato galego de waterpolo alevín mixto, ao aire libre nas piscinas do Mercantil
Por Alejandro Espiño |
-
Medalla de bronce para o CW Pontevedra no Campionato Galego Infantil de waterpolo
Por Redacción |
-
A Copa Galega, última competición da tempada para o equipo absoluto do Waterpolo Pontevedra
Por Redacción |
-
O Waterpolo Pontevedra anima a 'mollarse' cunha campaña de microfinanciamento
Por Redacción |