O Unión Grove sorprende ao Villalonga e o Céltiga cae en Porriño
Por Redacción
Sorprendete derrota do líder Villalonga na casa (0-2) ante un Unión Grove que dá un paso importante cara á permanencia. O cadro meco asaltou San Pedro cun gol de Diego Lorenzo á media hora de xogo e outro, nos últimos minutos e cos locais envorcados, obra de Félix Aguín.
Pese ao tropezo o Villalonga mantén 11 puntos de vantaxe sobre a terceira praza, que ocupa agora o Porriño, mentres o Unión Grove ascende ao décimo cuarto posto con 42 puntos.
Tamén sufriu un tropezo esta xornada o segundo clasificado, o Céltiga, que non puido co Porriño Industrial a domicilio (1-0) por culpa dun temperán gol de Diego Oliveira. A pesar diso os da Illa mantéñense en zona de ascenso con tres puntos de vantaxe sobre o propio Porriño.
Peor lle foron as cousas a Portonovo e Sanxenxo. Os primeiros conseguiron polo menos salvar un punto no campo do Arenteiro (1-1), ao igualar no minuto 70 cun gol de Roberto Otero o tanto inicial dos locais. Pola súa banda o Xuventú Sanxenxo viuse sorprendido en Baltar de Arriba polo Ourense CF (1-2) nun choque no que se adiantou cun tanto de Jonatan aos 14 minutos pero no que os visitantes remontaron cun gol antes do descanso e outro mediada a segunda metade.
Estes resultados deixan ao Xuventú Sanxenxo na duodécima praza con 43 puntos, mentres o Portonovo é décimo quinto con 41.