Paso de xigante do Céltiga cara ao ascenso e empates nos derbis en Portonovo e O Grove
Por Redacción
Xornada redonda para o Céltiga na súa loita por retornar á Terceira División. Os da Illa golearon ao Alertanavia (5-0) no Salvador Otero e aproveitaron o tropezo do Gondomar para coller catro puntos de vantaxe sobre a terceira posición.
Machu adiantou aos locais na primeira metade, pero non foi ata o segundo acto cando o Céltiga superou ao seu rival con catro goles máis para decidir o choque.
Os da Illa tamén recortan puntos sobre o sólido líder Villalonga, depois de que os celestes non pasasen do empate en Baltar ante o Portonovo. Manu Santos puxo en vantaxe ao Villalonga na primeira metade, pero un gol en propia meta a falta de seis minutos recompensou o esforzo dos locais.
Pese ao empate o Villalonga mantén oito puntos de renda sobre o Céltiga. Pola súa banda o Portonovo é décimo cuarto con 40 puntos.
Tamén acabou en empate, pero con choiva de goles, o choque no Monte da Vila entre Unión Grove e Xuventú Sanxenxo (4-4).
Os amarelos tiveron o partido na súa man tras dominar claramente a primeira metade, chegando ao descanso cun 1-3, pero os locais reaccionaron na segunda parte e acabaron rescatando un punto no desconto cun gol de penalti de Manuel Blanco.
Este resultado deixa ao Sanxenxo undécimo con 43 puntos e ao Unión Grove décimo quinto con 39.