Punto de caste e ouro para o Teucro nun partido vibrante ante Villa de Aranda (30-30)
Por Ramiro Espiño & Diego Torrado
Cando un equipo, que non conseguiu vencer nun partido en toda unha volta e que ademais recibe na súa pista a vista do quinto clasificado, exhibe na pista a actitude, garra e entrega que puxo o Teucro no seu partido ante o Villa de Aranda, hai que pensar que calquera obxectivo que se propoña, por complicado que pareza, pode ser posible.
Os de Quique Domínguez seguen sen gañar, si, pero sumaron un punto de ouro e poida que tamén o rearmamento moral que necesitaban para afrontar unha recta final da tempada na que cada partido será clave para a permanencia.
Foi un partido vibrante, no que ningún dos dous equipos conseguiu escaparse nunca no marcador. Os casteláns dominaron a primeira parte, pero a súa renda nunca superou os tres goles, inmediatamente contestados por un Teucro que non deu tregua, imprimindo un ritmo vertixinoso a todas as súas accións. Na segunda as alternativas sucedéronse, con vantaxes mínimas para un e outro.
Calquera puido gañar. Os dous tiveron as súas opcións, pero quizais o mereceu máis o Teucro, que foi capaz de superar a maior envergadura física do seu rival, co dinamismo do seu xogo de ataque. Se non o conseguiu foi por pequenos detalles nun par de momentos craves, cando tivo un par de opcións para poñerse con dous tantos de renda, pero pecou de precipitación, unido aos tres lanzamentos de sete metros que se deixou no camiño, especialmente un de David Chapela, a falta de catro minutos, que devolveu a iniciativa aos visitantes.
A primeira parte foi de tolemia. Cunha defensa moi aberta en 4-2 sobre central e lateral dereito visitante, Quique Domínguez quería evitar os lanzamentos de primeira liña, pero o Villa de Aranda aproveitouse dos ocos para atopar a conexión co pivote e machucar a portería azul.
Respondía o Teucro con accións eléctricas, que tamén facían dano no 6-0 castelán. A consecuencia é que ambos os porteiros sufrían, e os cambios baixo paus non achegaban melloría, co que o marcador se movía a un ritmo trepidante.
Arkaitz Piriz conseguía empatar por primeira vez (12-12) aos 19 minutos, obrigando ao técnico visitante a pedir tempo morto. A partir de aí a igualdade foi absoluta. O Teucro tivo balón en superioridade para irse ao descanso con vantaxe mínima, nunha acción con porteiro-xogador, pero o lanzamento foise ao poste.
Os comezos da segunda parte foron un calco da primeira. De novo Villa de Aranda púxose arriba cun parcial de 1-3 (18-20) pero o Teucro non lle permitiu máis. Cun xogo máis elaborado agora nos ataques estáticos, os locais lograban poñerse por primeira vez con vantaxe (21-20) aos 37 minutos, cun gol de Dani Hernández en inferioridade.
Superado o ecuador deste segundo tempo, con empate no marcador (25-25) o Teucro comete dúas faltas en ataque consecutivas e ademais Dani Hernández é excluído. Pero os azuis non baixaron a garda nin se deron por vencidos. David Chapela tomou o mando do equipo e un gol seu poñía novamente aos locais por diante (28-27) a falta de seis minutos.
Emoción máxima e incerteza total. O propio Chapela falla un penalti e Oswaldo aproveita para volver adiantar aos seus. David Chapela empata de novo e o Villa de Aranda perde o balón na acción de ataque, pero Teucro non acerta no lanzamento.
A falta dun minuto o conxunto visitante pide tempo morto, prepara a xogada e Oswaldo marca (29-30). Restaban 40 segundos. Dani Hernández penetrou con decisión entre a defensa local para empatar (30-30) a falta de 8 segundos. Gonzalo Carró foi excluído por frear o ataque visitante, que aínda dispuxo de 6 segundos para unha última xogada, ben defendida por un Teucro intenso, que se resiste a dicir a súa última palabra.
SD TEUCRO (30): Ritxi Amérigo; Erik Balenciaga (2), David Chapela (7, 2 de penalti), Carlos García (6, 4 de penalti), José Manuel Rial (1), Edu Moledo (1), Samu Gómez -sete inicial-, Andrés Delgado (p.s.); Arkaitz Piriz (3), García Pichel (2), Víctor Rodríguez, Iván Fernández, Gonzalo Carró (3), Carlos Gehrhartd, Roman Pedreira e Dani Hernández (5, 1 de penalti).
VILLA DE ARANDA (30): Santana; Peciña (1), Javi Muñoz (5, 4 de penalti), Revin, Oswaldo (5), Padilla (2), Guille (3) - sete inicial-, Rangel Luan (p.s.); Canyigueral, Part, Moyano (4), Tomás Moreira (4), Cakic (2), Nantes (2) e Adrián (2).
Árbitros: Rafael Alberto García Mosquera (Galicia) e Gregorio Muro San José (Madrid). Excluíron dous minutos a Víctor Rodríguez, Dani Hernández (2), Gonzalo Carró (2) e José Manuel Rial, polo Teucro, e a Padilla, Nantes, Part (2) e Tomás Moreira, polo Villa de Aranda.
Marcador (cada cinco minutos): 2-3, 5-7, 8-11, 12-13, 16-17, 17-17 (descanso), 18-20, 21-21, 24-24, 25-26, 28-27 e 30-30 (final).
Incidencias: Pavillón Municipal dos Deportes (Pontevedra). 1.400 espectadores. Durante o descanso do partido tivo lugar a presentación á afección de todos os equipos da SD Teucro na tempada 2015-2016.
Relacionadas:
-
Naturhouse impón a lóxica e varre ao Teucro no primeiro tempo (33-26)
Por Redacción |
-
O Teucro visita A Rioxa convencido de que "intocable sólo es el Barcelona"
Por Diego Espiño |
-
Villa de Aranda, unha auténtica final para o Teucro
Por Diego Espiño |
-
Quique Domínguez carga contra os árbitros e o Teucro compite pero cae en León fronte ao Ademar (34-28)
Por Redacción |
-
A retirada do BM Aragón, unha "mala noticia" para o Teucro aínda que lle achegue á permanencia
Por Diego Espiño |
-
Quique Domínguez seguirá adestrando ao Teucro dúas tempadas máis "estemos donde estemos"
Por Diego Espiño |