Sen descanso en Noitevella e Aninovo para o Pontevedra pensando na complicada viaxe a Burgos
Por Diego Espiño
Terminar a primeira volta cun triunfo que lles consolide en postos de play-off. É o obxectivo dun Pontevedra que traballa sen descanso pensando no seu regreso á competición cun esixente desprazamento a Burgos (domingo 17:00 horas).
Para chegar nas mellores condicións, e tras unha semana de vacacións, o corpo técnico programou sesións de adestramento durante o que resta de semana, incluídas as datas sinaladas de Noitevella e Aninovo.
Os granates traballarán o xoves en horario de mañá en Poio, mentres o día 1 o adestramento desenvolverase pola tarde en Príncipe Felipe. Tamén adestrarán o sábado antes de emprender viaxe a terras castelás, onde espera un equipo que chega no seu mellor momento dos últimos meses ao encadear tres vitorias consecutivas.
As vacacións sentaron ben á maioría de futbolistas, que se atopan en perfectas condicións físicas a excepción do lesionado Álex Fernández e de Adrián Mouriño, de baixa tras ser operado de apendicite. De feito a principal incógnita no once será quen ocupará a vacance deixada polo centrocampista.
Peor o terá Ángel Viadero no Burgos, que volveu ao traballo coa mala noticia da lesión de longa duración do central José Manuel Pérez ao confirmarse que sofre unha rotura do ligamento cruzado do seu xeonllo. Ademais será baixa con total seguridade o centrocampista Iván Zarandona, con problemas na clavícula.
VIAXE ORGANIZADA POLA PEÑA MOCIDADE GRANATE
O Pontevedra non estará só no Plantío. É polo menos a intención da peña Mocidade Granate, que organiza unha viaxe en autobús para os afeccionados que queiran acompañar ao equipo. O prezo do autocar é de 30 euros por persoa, tarifa que sería menor de completar todas as prazas e á que habería que sumarlle a entrada. Os interesados poden contactar coa peña a través das súas contas en Twitter e Instagram.
ANTE O RÁPIDO DE BOUZAS, O 6 DE XANEIRO
O club pontevedrés confirmou que o encontro de ida dos oitavos de final da Copa Federación, no que se enfrontará ao Rápido de Bouzas, disputarase o vindeiro mércores 6 de xaneiro ás 17:00 horas no Estadio Municipal de Pasarón.
Relacionadas:
-
Un gris Pontevedra encoméndase a Edu para rabuñar un valioso punto en Burgos (1-1)
Por Redacción |
-
El Plantío, primeira parada do ano para o Pontevedra
Por Diego Espiño |
-
Mouriño, de baixa tras ser operado de apendicite
Por Redacción |
-
Un mes de xaneiro cargado de partidos para o Pontevedra
Por Diego Espiño |
-
Contra a Cultural Leonesa e a pesar dunha arbitraxe nefasta, o Pontevedra (2-1) remonta e entusiasma
Por Ramiro Espiño & Diego Torrado |