O Teucro roza a gloria pero cede ao final fronte a Naturhouse La Rioja (30-32) nun gran partido
Por Ramiro Espiño & Diego Torrado
Hai derrotas que engrandecen a un equipo, que lle fan crecer como tal, provocando case na mesma medida o aplauso dos afeccionados e o respecto dos rivais. É o caso da que encaixou o Teucro, que cedeu por primeira vez esta tempada ante os seus fronte a un dos galos da liga Asobal como o Naturhouse La Rioja, pero ao que fixo sufrir ata o último segundo.
Os de Quique Domínguez fixeron un grandísimo partido, cheo de loita, entrega e calidade. Mandaron no marcador durante toda a primeira metade, na que chegaron a dispoñer dunha vantaxe de cinco goles, e boa parte da segunda, aguantando daquela o tirón dos rioxanos, aos que non deixaron nunca que se separasen máis aló dos dous goles, mantendo ata o final as súas opcións de conseguir algún dos puntos en disputa, que por xogo mereceron sobradamente.
Decidiu o partido a maior profundidade de banco da que dispón Jota González, obrigado a pedir incluso un tempo morto a falta de 14 segundos para o final, para evitar a que estivo a piques de ser unha das sorpresas da liga, mentres as bancadas do Municipal pontevedrés vivían unha festa, coa afección empuxando aos seus en busca da proeza.
Sustentado no dúo Ritxi Amérigo-Erik Balenciaga, ben secundados pola sensacional achega de Carlos García e José Manuel Rial, os de Quique Domínguez realizaron un primeiro tempo memorable. Defensa seria, rápida de pernas para chegar ás axudas evitando exclusións e ataques eléctricos. O resultado ao descanso (18-14) era fiel reflexo de quen mandara na pista.
Pero Naturhouse, que se alimentou case en exclusiva dos escasos erros cometidos polos teucristas en ataque, volveu á pista máis centrado e pronto reduciu diferenzas poñéndose a un gol (20-19, minuto 35).
Aínda reaccionaría o Teucro ao grande para volver distanciarse (24-20, minuto 37), pero aquí comezaron os problemas, alimentados pola baixa de David Chapela, que se deixaba notar na fluidez do xogo de ataque cando Quique Domínguez víase obrigado a dar descanso na dirección de xogo a Erik Balenciaga. Naturhouse aproveitou o atasco dos locais para portería para lograr un parcial de 1-7 e poñerse por diante por primeira vez desde o minuto inicial (25-27, minuto 43).
Ao Teucro custáballe pechar a conexión central-pivote entre Víctor Vigo e Javi García. Cando o conseguiu apareceu Malmagro para tomar a substitución. Pero nin con esas lograrían os rioxanos escaparse. Incluso os locais tiveron varias accións para volver empatar o partido e conseguírono no minuto 51, por medio de Gonzalo Carró (29-29).
Con 29-30 no marcador (minuto 52), os dous equipos pasan por unha fase de desacerto atacante que lles levaría a estar sen marcar ata o último minuto, cando Malmagro sentenciou o partido co 29-31. Antes o Teucro foi capaz de repoñerse a unha exclusión de Rial, sen encaixar gol, roubando dúas veces o balón, pero atopándose cun acertado Kappelin, que detivo os lanzamentos en seis metros de Balenciaga e de Rial, no seu regreso a pista, evitando unha nova igualada.
Nin no último minuto entregouse o Teucro, que seguiu loitando. Edu Moledo fixo o 30-31, con 31 segundos por xogar, pero Naturhouse tirou de oficio. O seu técnico parou o partido para preparar xogada e sobre a bucina Pedro Rodríguez facía o definitivo 30-32, mentres a afección tributaba ao seu equipo unha longa e máis que merecida ovación polo gran partido que realizara o Teucro, a pesar da derrota.
SD TEUCRO (30): Ritxi Amérigo; Edu Moledo (3), Dani Hernández (5, 3 de penalti), Erik Balenciaga (6), Gonzalo Carró (1), García Pichel (2), Carlos García (4) -sete inicial- Andrés Delgado (p.s.); José Manuel Rial (7), Samu Gómez, Víctor Rodríguez (1), Román Pedreira (1, de penalti), Arkaitz Piriz e Iván Fernández.
NATURHOUSE LA RIOJA (32): Kappelin; Pedro Rodríguez (6), Molina (3), Garabaya (1), Víctor Vigo (4), Stenmalm (2), Ángel Fernández -sete inicial-, Gurutz Aguinagalde (p.s.); Alberto Val (1), Malmagro (6), Garciandia (1), Javi García (4) e Sánchez Migallón (4).
Árbitros: Carlos Luque Cabrejas e Ignacio Pascual Sánchez (Cataluña). Excluíron dous minutos a José Manuel Rial, polo Teucro, e a Ángel Fernández, Malmagro, Garabaya e Stenmalm, polo Naturhouse A Rioxa.
Marcador (cada cinco minutos): 3-1, 6-3, 10-6, 12-9, 15-11, 18-14 (descanso), 20-19, 25-24, 25-27, 28-29, 29-30 e 30-32 (final).
Incidencias: Pavillón Municipal dos Deportes (Pontevedra). Uns 1.200 espectadores.
Relacionadas:
-
Barcelona Lassa supera un digno Teucro (44-30) igualando o record de vitorias da liga
Por Redacción |
-
O Teucro, ante o seu partido máis complicado
Por Diego Espiño |
-
Conxura teucrista para dar a sorpresa ante o invicto Naturhouse La Rioja
Por Diego Espiño |
-
Semana para recuperar aos tocados antes de afrontar o 'Tourmalet'
Por Diego Espiño |
-
O Villa de Aranda pode cun combativo Teucro (35-29)
Por Redacción |