Lleida, primeira rolda por etapas para o Supermercados Froiz
Por Redacción
Despois dun difícil inicio de tempada, sen lograr destacar nas citas da Copa de España de Ciclismo Elite e sub-23 nin nas primeiras carreiras do calendario, chega o terreo do Grupo Deportivo Supermercados Froiz.
A escuadra pontevedresa afronta en Cataluña a súa primeira rolda por etapas do curso, a LVIII Volta a Lleida, un terreo no que se desenvolve con máis soltura que nas probas dun día.
A Volta a Lleida constará de catro etapas os días 27, 28 e 29 de marzo, tres delas en liña e unha crono de 6,5 quilómetros, a disputar nunha dobre sesión o día 28.
A etapa inaugural e a final serán as máis esixentes, empezando o sábado coa ruta entre Lleida e Balaguer con 129,9 quilómetros e ascensións a dous portos de primeira categoría (Fontilonga e Coll de Ager) e rematando cunha última etapa que contará con 112 quilómetros e ata seis ascensións, cinco de terceira categoría e unha de segunda.
O equipo do Froiz na rolda catalá formarano: Martín Lestido, Pedro Merino, José Luis Mariño, Miguel Gómez, Sergio Míguez, Rubén García e Alejandro Lomba.