Vilagarcía e Caldas de Reis acollerán en outubro un torneo do World Padel Tour
Por Diego Espiño
O centro deportivo de Condesa Sport, en Caldas de Reis, e o pavillón de Fexdega, en Vilagarcía, acollerán o próximo mes de outubro un torneo do circuíto profesional de pádel máis importante do panorama internacional, o World Padel Tour.
A confirmación oficial chegou este luns na presentación oficial da tempada 2015 do World Padel Tour en Madrid.
Tras dous anos de xestións Condesa Sport logra o seu obxectivo de acoller unha proba internacional, baixo a denominación de Open de Galicia, que reunirá preto de 100 parellas entre os días 12 e 18 de outubro coa presenza dalgúns dos mellores xogadores do ranking mundial.
A fase previa disputarase no centro deportivo situado en Caldas de Reis, mentres as eliminatorias e a gran final terán como escenario un recinto de gran capacidade como Fexdega, onde se instalará unha pista para a ocasión.
Roberto Bacariza: "ÿ a maior aspiración á que pode optar un club de pádel"
Trátase, segundo asegura o xerente de Condesa Roberto Bacariza, da "maior aspiración á que pode optar un club de pádel".
Caldas e Vilagarcía foron incluídos nun circuíto mundial no que figuran torneos como os de Dubái, Montecarlo, Lisboa, Madrid, Barcelona ou Valencia, entre outros, sendo o único confirmado no noroeste peninsular.
Tras a designación o centro deportivo traballa xa na súa organización como un reto "enorme, xa que o nivel de esixencia que nos impoñen é máximo e ten que estar todo controlado ao milímetro", declarou Bacariza.
Para o xerente das instalacións acoller unha proba do World Padel Tour "supón todo un fito para o noso club e para a nosa bisbarra".