Cortegada devolve a moeda ao Arxil e lévase o derbi (54-65) apertando a liga
Por Redacción
Era moito máis que un derbi. Era a posibilidade de deixar sensiblemente tocado un rival directo, en caso de vencer o Arxil, ou de apertar a liga, de facelo as vilagarcianas. Sucedeu o segundo.
Portomar Cortegada foi mellor e non só levouse a vitoria, senón tamén o parcial entre ambos os dous (as pontevedresas venceran en Vilagarcía por catro puntos), arrebatando ás de Mayte Méndez o terceiro posto da liga e deixando o cadro arxilista cunha soa vitoria de vantaxe sobre Celta e León.
E iso que o partido non puido comezar mellor para o equipo local, que realizou un bo primeiro cuarto no que case dobra a anotación do seu rival. Non obstante Cortegada afianzou a súa defensa no segundo parcial, afogando un Arxil que non encontraba posicións cómodas de tiro e volvía ter o seu punto débil no seu baixo acerto no tiro exterior, que non logrou compensar co dominio baixo os taboleiros.
O terceiro cuarto foi a sentenza para as locais, que chegaron a ir perdendo ata por 17 puntos, ata rematar encaixando unha derrota que pon moi caro o play-off de ascenso, con catro equipos para dous postos.
CB ARXIL (54): Maimouna Diarrá (21), Ana Martín (5), Noelia Fernández (2), María Lago (4), Fallon Lewis (11) -cinco inicial-, Ana María Román (4), María González (3), Cristina Díaz-Pache e Sandra Entenza (4).
PORTOMAR CORTEGADA (65): Montse Gilabert (12), Sara Gómez (12), Laura (8), Mame Sy (10), Tabara (6) -cinco inicial-, Marta (9), Espe Ventoso (2) e Alejandra Nogueira (6)
Árbitros: Rois Rilo Antelo e Guillermo Marcos Ríos. Sinalaron 22 faltas ao Arxil e 13 ao Portomar. Eliminaron por cinco faltas a xogadora local Ana Martín.
Marcadores parciais: 18-10, 6-19 (24-29, descanso), 12-21 (36-50) e 18-15 (54-65, final).
Incidencias: Pavillón do CGTD (Pontevedra). Uns 300 espectadores.