Furya Granate explica as causas da súa disolución cargando contra Mauricio Rodríguez e Lupe Murillo
Por Redacción
Atrás quedan 14 anos de historia. O partido entre Pontevedra e Arosa foi a súa última aparición como grupo. Furya Granate, a peña de afeccionados do Pontevedra CF máis antiga das activas actualmente confirmou a noticia adiantada por PontevedraViva, facendo oficial a súa disolución nunha rolda de prensa celebrada na tarde deste venres, na que explicaron os motivos que lles levaron a tal decisión.
Empezaron sendo adolescentes, case nenos, a maioría deles. Con acertos e erros, foron a voz de Pasarón e os animadores da maioría de partidos nos que seguiron e apoiaron o club dos seus amores, cando outros desfalecían ou quedaban en silencio ante as adversidades deportivas.
Agora ceden a testemuña a outros máis novos e que veñen empurrando, así dino nun comunicado ao que deu lectura o seu presidente Manu Rey, en nome do colectivo, no que din: "Após case 14 anos de fidelidade ás cores do Pontevedra CF e de compromiso político e social coa cidade e co País, decidimos que a historia da Furya Granate como tal, remata aquí".
E ata designan sucesores da súa traxectoria na tarefa de animar á bancada, os mozos da recén creada Mocidade Granate: "Ao igual que nós seguimos o camiño que antes marcou o Frente Granate, Bravú Norte ou a Fossa Grana, nós damos agora o relevo aos rapaces e rapazas da Mocidade Granate, que xa demostraron que están máis que preparados para converterse na voz de Pasarón, e que rebosan ilusión e granatismo polos catro costados".
Precisamente unha representación de membros deste novo colectivo estaba presente na rolda de prensa, aproveitando para anunciar que a acabada de nacer peña, Mocidade Granate, conseguiu fretar un autobús para acompañar ao equipo, no que será o seu primeiro desprazamento como colectivo, a Redondela, para presenciar o partido ante o Choco. A viaxe no devandito autobús, para o que completaron todas as súas prazas, é gratuíta para os afeccionados que se despracen, que unicamente deben aboar o importe da entrada.
"A actual presidenta non é capaz de aceptar a ninguén que non lle de a razón. Non deixaremos de loitar dende os frontes que poidamos polo cambio"
Na súa exposición de motivos os compoñentes de Furya sinalan sen dubidar o expresidente, Mauricio Rodríguez, e a actual presidenta, Lupe Murillo, para cuxo labor non teñen precisamente eloxios, indicando que Furya desaparece, pero os seus compoñentes seguirán loitando para conseguir que o Pontevedra estea dirixido polo que eles cualifican como granates de corazón: "Non podemos marcharnos sen defender a nosa filosofía que é a de loitar polos intereses do noso clube. Por iso non podemos deixar de ser críticos cos últimos consellos de administración que pasaron polo Pontevedra CF nos últimos anos. No persoal, que é o menos importante, só podemos intentar olvidar o trato recibido polo anterior presidente Mauricio Rodríguez Boullosa, así como a prepotencia e deixadez mostrada pola actual presidenta que deixou de lado a masa social deste clube, comenzando polo seu activo máis importante: as Peñas, polas que non mostrou nin o máis mínimo interese, porque claro, ela non é capaz de aceptar a ninguén que non lle de a razón. No institucional, solo podemos referirnos a eles como os xestores que non souberon xestionar, así de fácil. Non fai falla máis que ver a actual situación do fútbol base do clube, apartado máis que defendido nos seus proxectos, e que se encontra na peor situación que vivimos todos os presentes nos anos que levamos seguindo ao noso clube. No económico, a parte dunha total falta de transparenza, as súas xestións baséanse en defender a rebaixa da deuda do clube, conseguida no 100% pola lei concursal que pasamos, non o esquezamos, non imos falar dos impagos aos xogadores, empregados, Seguridade Social e Facenda, porque iso é mellor que non se saiba, ou iso é o que pensan eles. Así funciona este clube señores, é unha mágoa que a maioría da afección granate non coñeza a realidade, por todo isto queremos deixar claro que marchamos coma peña, pero non deixaremos de loitar dende os frontes que poidamos polo cambio, un cambio para que este clube este dirixido por granates de corazón sen máis intereses que conseguir o mellor para o PCF".
Tamén sinalaron o cansazo e a desilusión como algunhas das principais razóns da súa disolución: "Despois do traballo de case tres lustros, e con centos de obstáculos superados e de golpes recibidos nas nosas costas, a desilusión e o cansanzo fan mella nos membros máis activos. Xa nos últimos anos, que unido á falta de relevo xeracional interno e aos poucos membros cos que contaba actualmente o grupo, isto non fose máis que a confirmación cunha decisión xa argallada a tempada pasada, e que foi posposta pola importancia do tramo final da anterior liga e polo mal comezo do equipo na actual".
Igualmente fixeron repaso dalgúns dos fitos que a Peña viviu seguindo o Pontevedra: "No recordo queda o recoñecemento de toda a afección granate que algún momento se sentiu identificada con este pequeno grupo; visitas a cidades e estadios históricos coma A Romareda, Mendizorrotza, Carlos Tartiere, Riazor, Vallecas, Balaídos, O Molinón, San Lázaro, O Couto viaxes que pasaron á historia do clube e marcaron un antes e un despois nesta coma Miranda do Ebro; milleiros de quilómetros percorridos a Ceuta, Córdoba, Sevilla, Barcelona, Portugalete, do cal ainda seguimos esperando unha desculpa por parte do clube, ou Puertollanovictorias épicas acadadas en Pasarón contra o Celta, o Zaragoza, o Rayo ou o Oviedoverdadeiras invasións granates coma a Ferrol ou Ourense E como esquecer aquela tarde de xuño fronte ao Lorca, o mellor día das nosas vidas sen dúbida, e que tarde ou cedo voltaremos repetir".
Houbo tempo tamén para agradecementos, ademais de deixar unha mensaxe clara aos que poidan alegrarse da súa disolución: "Queremos dar as grazas a todas aquelas persoas, e foron moitas, que esta semana mostraron o seu apoio e nos dedicaron mensaxes de ánimo, non o esqueceremos, como aos xogadores e ex-xogadores do noso clube. Dar as grazas tamén aquelas que se alegran da nosa desaparición, por facernos máis importantes e darnos forzas para seguir loitando polo noso clube. Simplemente lembrar que a Furya Granate desfaise coma colectivo, máis que a maioría de nós non deixaremos ao equipo de lado, e seguiremos acudindo a Pasarón e aos desprazamentos a título individual, e por suposto, que seguiremos a loitar contra o fútbol negocio e polos dereitos dos socios e socias deste clube e sendo o azoute de caciques que pretendan utilizar o noso clube en beneficio persoal. Por riba das siglas, de todos e de todo, FORZA PONTE SEMPRE".
Relacionadas:
-
O Pontevedra roza xa os 1.900 abonados, unha cifra similar á da tempada pasada
Por Redacción |
-
A peña Furya Granate anuncia a súa disolución
Por Redacción |
-
As peñas do Pontevedra esixen a dimisión de Lupe Murillo e a declaración de Mauricio Rodríguez como persoa non grata
Por Ramiro Espiño |
-
Quince colectivos de afeccionados constitúen a nova Asociación de Peñas do Pontevedra
Por Ramiro Espiño |