Mariano Rajoy sobre a fase de ascenso do Pontevedra CF: "Tiene que subir. Yo creo que subimos"
Por Mónica Patxot & Anxo Lourido
Pilar Rojo esperaba ante o edificio da Subdelegación do Goberno ás 18:25 da tarde. A presidenta do Parlamento de Galicia agardaba a Mariano Rajoy e o resto de compañeiros do Partido Popular que tiñan previsto realizar un paseo por Pontevedra dentro da campaña ás eleccións europeas. Pero o presidente do Goberno adiantárase vinte minutos e xa se encontraba na rúa Benito Corbal visitando establecementos comerciais e repartindo folletos do PP entre os pontevedreses que se cruzaban no seu camiño.
Entre un amplo dispositivo de seguridade e acompañado por un séquito importante de membros do partido, Rajoy continuaba o seu percorrido por Sagasta parándose con algúns dos paseantes, na maioría dos casos mulleres de mediana idade. Dúas delas recibían propaganda de man do presidente e comentaban "nós dixémoslle que non queriamos pero déunola igual". Outras observábanlle e comentaban en alto as súas intencións: "Vamos a darle un biquiño? ". Rajoy detívose nas galerías do antigo cine Gónviz a conversar animadamente durante un par de minutos cunha muller que camiñaba apoiándose nunha muleta: "es que conozco a Mariano", aclarou despois, "soy amiga de su cuñada".
Tras o percorrido inicial, o presidente do Partido Popular facía unha parada no Hotel Rías Baixas. Os membros de seguridade xa prepararan o terreo. "¿Has mirado los baños?", preguntaba un deles. "Ay, los baños no", contestaba o compañeiro e, antes da chegada do presidente, entraba na cafetaría do hotel para comprobar que todo estaba en orde. A ministra Ana Pastor e Mariano Rajoy sentábanse nas cadeiras máis próximas á ventá que dá á rúa Castelao; Alberto Núñez Feijóo, Francisco Millán Mon, Benito Suárez Costa e Jacobo Moreira completaban a mesa da merenda popular, presidida por Rafael Louzán. "Un café con hielo" pediu Rajoy. Servíronllo acompañado por unhas patacas fritas, que compartiu coa ministra de Fomento. Na rúa agardaban concelleiros do Partido Popular en Pontevedra, os membros de seguridade e os medios de comunicación. Tanto tumulto chamaba a atención de numerosos viandantes. " Hai algún famoso? " preguntaba un home. "Rajoy", afirmaba a muller. "Ese non mete goles", contestaba o marido.
"Tiene que subir. Yo creo que subimos. Claro que lo voy a seguir, ya te he dicho lo que ha pasado en la última jornada, por los pelos"
Media hora de café con xeo máis tarde, os políticos regresaron á rúa, agora con máis présa. A paso lixeiro dirixíronse cara á Peregrina. Facíase tarde, o Partido Popular programara un mitin en Vigo. Durante o percorrido o voceiro do grupo municipal do PP, Jacobo Moreira, tivo tempo para pedirlle un 'selfie' ao presidente do Goberno. Tras a foto, unha das voluntarias de Acción contra a Fame achegouse a Mariano Rajoy e a Núñez Feijóo mostrándolles a súa carpeta para captar socios para a organización humanitaria. "A fame ten solución. Foi o que me dixeron", aseguraba a moza.
A preguntas de PontevedraViva, o presidente do Goberno tivo tempo durante o tramo final do paseo de manifestar o seu apoio aoPontevedra Club de Fútbol durante a fase de ascenso que vai afrontar o club granate. "Sé que ha quedado de cuarto y sé también que en el último partido por los pelos. Se quedó fuera el As Pontes. Tiene que subir. Yo creo que subimos. Claro que lo voy a seguir, ya te he dicho lo que ha pasado en la última jornada, por los pelos", indicou Rajoy, que continuou charlando sobre fútbol con Rafael Louzán. O gabinete de prensa non permitía máis preguntas: "Has tenido suerte. Sobre temas deportivos siempre dice algo".
E a paso apurado, aínda que se esquecer algunha parada para fotografarse con nenos e adultos que demandaban unha instantánea, Mariano Rajoy chegaba ata a Subdelegación do Goberno na Praza de España onde subía xunto aos principais dirixentes aos vehículos oficiais. Próximo destino, Vigo e o Celta. A campaña é así.