A toponimia e a antroponimia no cancioneiro, temas da VIII Xornada de Onomástica Galega
Por Redacción
O vindeiro 21 de outubro regresa a Pontevedra a Xornada de Onomástica Galega coa súa oitava edición, onde porá acento nos nomes propios e á súa riqueza na cultura popular.
O encontro anual que organiza o Seminario de Onomástica da Real Academia Galega, coa colaboración coa Deputación de Pontevedra e do Museo de Pontevedra, abarcará nesta ocasión a presenza da toponimia e a antroponimia no cancioneiro, aínda que tamén terá en conta outros xéneros. Haberá ademais tempo para coñecer experiencias dende o mundo educativo relacionadas co tema da xornada, que rematará cunha actuación musical de Tralo-Valo.
As sesións celebraranse durante todo o día no Edificio Castelao do Museo de Pontevedra e as persoas que desexen seguilas presencialmente deben inscribirse enviando un correo electrónico, antes do 18 de outubro, a publicacions@academia.gal cos datos que se indican no programa, dispoñible en academia.gal.
Segundo explicou a académica e coordinadora da xornada, Luz Méndez, xunto coa académica de número Ana Bullón, "a cita permitirá profundar, a través da cultura popular, na relación da onomástica coa oralidade". Deste xeito, "o eixo central é a expresión popular dos nosos nomes, transmitida durante xeracións e significativa para entender a nosa idiosincrasia tamén en canto á comunicación, á complicidade ou aos sobreentendidos que nos unen como pobo".
Os tres primeiros relatorios correrán a cargo de Domingo Blanco, Xosé Miranda Ruíz e Xosé Ramiro Cuba Rodríguez, que tratarán, respectivamente, os topónimos, os nomes de persoa e os nomes de santos no cancioneiro. A sesión da mañá continuará cunha achega de Antonio Reigosa Carreiras sobre a onomástica no conto galego de tradición oral e a ollada á relación entre a onomástica e a antropoloxía en Galicia de Elena Freire Paz.
Xa pola tarde, Carlos Baliñas Pérez falará sobre os usos sociais do cognomentum (alcumes, sobrenomes, nomes familiares...) na Galicia altomedieval e deseguido continuará cunha contribución dende o mundo da didáctica, como é costume nestas xornadas dende os seus comezos. Será da man da cantora, improvisadora e filóloga Alba María, que profundou co seu alumnado de secundaria na relación entre os romances e a onomástica.
A VIII Xornada de Onomástica Galega rematará cunha actuación musical de Tralo-Valo, con Carmen da Pontagra na voz e na percusión e Arial Ninas na zanfona.
Relacionadas:
-
María, o nome máis común no cancioneiro, e a denominación das casas rurais na Xornada de Onomástica Galega
Por Redacción |
-
Guerra entre academias: a RAE prefire Sangenjo e a RAG lembra que a única forma oficial é Sanxenxo
Por Natalia Puga |
-
Especialistas analizan os nomes literarios na VII Xornada de Onomástica Galega do Museo
Por Redacción |
-
Nomes literarios, concepto a analizar na VII Xornada de Onomástica Galega no Museo
Por Anxo Lourido |