Maxín Xulio Picallo Durán presenta en Cuntis o seu libro 'De Roncesvalles a Santiago de Compostela: un escultor en el Camino'
Por Redacción
Este sábado 23 de abril, a partir das 12.30 horas, a Casa da Cultura Roberto Blanco Torres do municipio de Cuntis, acollerá a presentación da obra 'De Roncesvalles a Santiago de Compostela: un escultor en el Camino', un traballo realizado polo artista Maxín Xulio Picallo Durán, un escultor nado en Troáns, a parroquia cuntense.
No acto tamén participarán a filóloga Maka Arca Camba; o prologuista Xesús Antonio Gulías Lamas; o escultor, natural de Barro, Francisco Remiseiro; o xornalista Fernando Salgado; e o alcalde do Concello de Cuntis, Manuel Campos Velay.
Trátase do primeiro traballo escrito de Picallo Durán, un autor de pezas escultóricas que se poden ver tanto en concellos de Galicia como, entre outros, Lugo, Porriño, Tui, Tomiño, A Estrada ou en Cuntis do mesmo xeito que noutros puntos tanto do ámbito estatal como internacional, desde Andalucía ata Arxentina, Brasil, Canadá, Estados Unidos, Porto Rico ou Suíza. O escultor estudou na Escola de Artes e Oficios de Compostela e foi alumno de aresta cambadés Francisco Asorey.
Maxín Picallo leva cincuenta anos residindo en Tomiño e compatibiliza o seu traballo como labrador da pedra coa elaboración de textos onde recolle reflexións, análises artísticas e experiencias vitais, que agora aparecen reflectidos neste libro con pensamentos relacionados co Camiño de Santiago.