Organizan un ciclo de obradoiros de envellecemento, autocoidado e saúde para a veciñanza de Cuntis
![Redacción](/web/cache/scene/uploads/xornalistas/foto/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/506490f5a15ce-c6ku5opwb5qbtijalxd0_reasonably_small.jpeg)
Por Redacción
A entidade Solidaridade Interxeracional, en colaboración co departamento de Servizos Sociais de Cuntis, impartirá a partir do 2 de maio un ciclo de obradoiros de envellecemento, autocoidado e saúde nos que convida a participar aos maiores de 60 anos residentes no municipio cuntiense.
Os obradoiros realizaranse en 11 lugares e parroquias, en diferentes horarios, sempre que reúnan un grupo mínimo de cinco persoas.
Así os días 2 e 3 de maio o obradoiro realizarase en Cuntis en horario de 11 a 12.30; en Cequeril e en Sebil será o luns, de 16 a 17.30 e de 18 a 19.30 horas respectivamente; o martes pola tarde será o turno de Couselo (16 a 17.30 horas) e de Arcos de Furco (18 a 19.30 horas); os maiores de Portela (16 a 17.30 horas) e Mesego (18 a 19.30 horas) poderán asistir a este ciclo na tarde do xoves e por último o venres impartirase en Magán (16 a 17.30 horas) e Teaño (18 a 19.30 horas).
Desde o departamento de Servizos Sociais recomendan aos maiores do municipio a participación nestes obradoiros, donde recibirán unhas pautas básicas sobre o mantemento de hábitos que favorezan un envellecemento activo e con plenas garantías. Para acudir é necesario inscribirse previamente antes do 29 de abril chamando ao número 986185468.