Un roteiro literario recupera en Cuntis a figura de Roberto Blanco Torres
Por Redacción
A figura do escritor e xornalista Roberto Blanco Torres, nacido en Cuntis, será o fío condutor do roteiro literario que o vindeiro sábado 8 de setembro guiará nesta mesma localidade pontevedresa o investigador e historiador Marcos Seixo.
A iniciativa foi presentada esta mañá polo propio Marcos Seixo, polo concelleiro de Cultura de Cuntis, Diego Torres, e polo deputado de Cultura e Lingua, Xosé Leal.
"Este itinerario é moi interesante porque vai facer fincapé nunha figura senlleira do xornalismo en galego feito nunha época na que era moi complexo ter medios no noso idioma no país", asegurou o deputado nacionalista.
Roberto Blanco Torres foi un xornalista e escritor en lingua galega que abandonou Cuntis de mozo, tras a morte do pai, para reunirse cos seus irmáns maiores en Cuba. Acabaría regresando a Galicia en 1916 asentándose na Coruña e formando parte das Irmandades da Fala e, tras o alzamento fascista, foi fusilado en 1937.
"Foi un home moi itinerante pero sempre volveu a Cuntis pasar longas tempadas", explicou o investigador Marcos Seixo.
Así, o percorrido do vindeiro sábado comezará no lugar onde naceu Roberto Blanco Torres, na rúa da Presiña, e continuará polo antigo Concello e pola casa do que fora médico e alcalde Vicente Carballo como mostra dos lugares de contacto represivo do 36.
O historiador tamén indicou que se visitará a casa de Coriña, a irmá de Roberto, na que se hospedaba cando ía de visita a Cuntis. "A última estancia documentada que teño de Roberto na casa de súa irmá data do San Martiño de 1935, que veu a Cuntis con motivo da matanza dese ano", asegurou Seixo, que leva ao redor de tres décadas investigando a obra e a pegada de Blanco Torres en Cuntis.
Outros lugares nos que fará paradas serán a casa do xornalista e crego Xosé Toubes, fundador do Ideal Gallego, o antigo casino, o cine Victoria, e o pazo de Ximonde, hoxe Casa da Cultura que precisamente leva o nome de Roberto Blanco Torres.
O itinerario rematará diante do busto de Blanco Torres realizado polo escultor de Cuntis Elisardo Pego con motivo da dedicación do Día das Letras Galegas ao escritor en 1999.
Este roteiro forma parte dun conxunto de sete paseos literarios pola provincia organizados polo departamento de Cultura e Lingua da Deputación en colaboración coa Asociación de escritoras e escritores en lingua galega.
As persoas interesadas en participar poden inscribirse no correo electrónico roteiros.cultura@depo.gal.