Sjón, letrista da cantante islandesa Björk, recitará poemas en PontePoética
Por Mónica Patxot & Anxo Lourido
Dez poetas dun elevado nivel artístico intervirán desde o 7 ao 9 de abril na sétima edición de PontePoética, o Festival Internacional de Poesía de Pontevedra. Unha cita que este ano contará con tres escenarios: o Teatro Principal, as Ruínas de San Domingos e o Pub El Pequeño.
Durante eses tres días visitarán Pontevedra os poetas Mireia Calafell, Andrés Neuman, Bernardo Atxaga, Ana Romaní, Cesáreo Sánchez Igrlesias, Berta Dávila, Antón Lopo, Sjón, Grazyna Wojcieszko e João Luís Barreto Guimarães.
Este mércores 29, a concelleira de Cultura, Anxos Riveiro acompañada pola poeta Yolanda Castaño e polo representante do Ateneo de Pontevedra, Antón Sobral, presentaban o programa desta edición que contará cun obradoiro de narrativa baixo a dirección de Andrés Neuman durante a mañá do sábado 8 e outro obradoiro de poesía con Bernardo Atxaga, ao longo da mañá do domingo 9.
Ambos os obradoiros son gratuítos e desenvolveranse no Teatro Principal e as persoas interesadas poden inscribirse a través do correo electrónico: cfuentesmoledo@yahoo.es ou no teléfono 669.428.188. O prazo para apuntarse péchase o 6 de abril.
A poeta Yolanda Castaño destacaba o alto nivel dos participantes coa intervención da autora polaca Wojcieszko que colabora co músico Adam Prucnal e, sobre todo, da gran estrela desta edición será o islandés Sjón, letrista da cantante Björk coa que formou parte do grupo The Sugarcubes. Conta cunha importante traxectoria como autor, que lle levou a estar nomeado a un Oscar da Academia de Hollywood polas letras na película Dancer in the dark, de Lars von Trier.
A entrada a todas as actividades da programación é libre.