O pianista coreano David Huh actuará o 11 de abril no Teatro Principal
Por Redacción
O pianista coreano David Huh será o próximo invitado do ciclo de concertos da Sociedad Filarmónica de Pontevedra. Actuará no Teatro Principal o vindeiro luns 11 de abril, a partir das oito e media da tarde.
Nacido en Pohang (Corea do Sur) en 1986, David Huh foi recoñecido en numerosos concursos nacionais e internacionais de piano.
Xa en 2007 comezou a atraer a atención internacional tras gañar o Primeiro Premio no Concurso Internacional de Xangai (China). Posteriormente, foi premiado nos concursos de Cleveland e Hamamatsu. Máis recentemente, en 2015, foi galardoado co Segundo Premio e Medalla de Prata na XVIII edición do Concurso Internacional de Piano de Santander Paloma O'Shea.
Actuou por toda Europa, Asia e Estados Unidos. Presentouse en numerosos festivais, incluíndo recitais en Animato en París, Festival de Música de San Francisco, Euro Music Festival en Leipzig, Festival de Música Euroregio, Festival Internacional de Piano Ferruccio Busoni, e International Holland Music Sessions, entre outros.
Máis recentemente, debutou con gran éxito coa Royal Concertgebouw en Amsterdam no ciclo Tour de Novos Mestres. Tamén actuou como solista coas orquestras sinfónicas de Tokio, KNUA e Radio Televisión Española.
En Pontevedra, David Huh ofrecerá un programa composto por L'Alouette Calandrelle, de Messiaen; Sonata Los adioses, de Beethoven; Variacións sobre un tema de Corelli, de Rachmaninov; e Sonata en si menor, de Franz Liszt.