Neira Vilas, gañador do premio Otero Pedrayo 2013
Por Redacción
Xosé Neira Vilas é a persoa galardoada co Premio Otero Pedrayo 2013. Así o acordou por unanimidade o xurado dos premios nunha xuntanza celebrada este xoves na Deputación Provincial de Pontevedra.
Con este galardón, que organizan cada ano de forma rotatoria as catro deputacións galegas e que nesta ocasión correspondeu á de Pontevedra, preténdese recoñecer o labor de persoas ou institucións que teñan realizado unha contribución eminente á cultura galega, á promoción dos valores propios de Galicia ou as obras que leven ao esclarecemento e á mellora da cidadanía e institucións de Galicia, así como recoñecer e honrar a memoria de persoas egrexias no campo das letras e o coñecemento.
O xurado considerou que Xosé Neira Vilas é merecedor deste recoñecemento por ser unha das figuras máis representativa das letras galegas actuais, pola súa inxente labor a prol da cultura galega; por ter contribuído ao longo de toda a súa vida a difundir a cultura e tradición de Galicia e por unir a xeracións durante anos entorno á nosa historia, á nosa lingua e á identidade e características propias.
O presidente da Real Academia Galega e membro do xurado, Xesús Alonso Montero, realizou unha semblanza do autor, incidindo na súa valía e destacando que, a súa traxectoria vital fai del o candidato de todos os cidadáns da cultura galega.
Ademais de Alonso Montero, formaron parte do xurado os secretarios xerais de Política Lingüística e de Cultura, Valentín García Gómez e Anxo Lorenzo, respectivamente; os deputados de Cultura das Deputacións de Lugo e Ourense, Mario Outeiro e Avelino García, respectivamente; o vicerreitor de extensión Universitaria da Universidade de Vigo, Manuel Fernández; o investigador do CSIC Isidro García Tato; Felipe Senén López, técnico de Xestión Cultural da Deputación de A Coruña; o escritor Luis González Tosar, e o director do Museo de Pontevedra, José Carlos Valle Pérez, baixo a presidencia da deputada responsable de Cultura da Deputación de Pontevedra, Ana Isabel Vázquez.
Relacionadas:
-
A Deputación de Pontevedra, anfitrioa do Premio Otero Pedrayo 2021
Por Redacción |
-
Falece aos 87 anos Xosé Neira Vilas
Por Redacción | Creada e actualizada
-
Neira Vilas, Carracedo, Loli Beloso ou como a literatura pode desbancar un Madrid-Barça
Por Natalia Puga & Diego Torrado |
-
Neira Vilas recibe o premio Otero Pedrayo por ser un ''activista literario''
Por Mónica Patxot & Oskar Viéitez |
-
Cando Neira Vilas viu o mar por primeira vez, "foi en Pontevedra e aquilo pareceume un desparrame"
Por Oskar Viéitez |