Este verán será "a era das fábulas" no Museo de Pontevedra
Por Redacción
A era das fábulas. A arte e o poder rexenerador da fantasía. Esa será a exposición central que o Museo de Pontevedra ofrecerá ao público este verán.
Trátase dunha conversa entre as coleccións do Museo de Pontevedra, a Fundación María José Jove e TBA21 Thyssen-Bornemisza Art Contemporary, que se inaugurará o próximo 10 de xullo e poderá visitarse ata o 29 de setembro no Edificio Castelao.
A mostra, que vinculará as coleccións de arte destas dúas fundacións da Coruña e Madrid cos fondos artísticos, arqueolóxicos e etnográficos do Museo de Pontevedra, ocupará as tres salas de exposicións temporais e outros espazos anexos e estará estruturada en tres actos.
Así, baixo os epígrafes Acto I. Imaxinación-mar, Acto II. Transformación-terra e Acto III. Renacemento-aire, mostraranse obras de Maruja Mallo, Vasili Kandinski, Pablo Picasso, Fernand Léger, Joan Miró, Miquel Barceló, Luis Gordillo, Louise Bourgeois, Ernesto Neto, Menchu Lamas, Noa e Lara Castro ou Teresa Solar, entre outros artistas.
A exposición xira arredor das narrativas ficcionadas, esenciais para comprender a realidade.
A plasticidade das fábulas e os contos permite preservar identidades culturais e imaxinarios populares, conectarnos coa natureza e estimular a imaxinación a través de animais, plantas e seres fantásticos, converténdoos en canalizadores de sabedoría.
A arte, ao igual que estes, ofrece a versatilidade para ser reinterpretada y reimaxinada ao longo do tempo, brindando perspectivas sobre a natureza humana, animal e vexetal e respostas imaxinativas a desafíos contemporáneos.
MÁIS PROGRAMACIÓN
Durante os vindeiros meses tamén permanecerán abertas a exposición Pregar a pintura, un retrato actual da Facultade de Belas Artes con estudantes recentemente graduadas, ata o 21 de xullo; e Mónica Alonso. A pel do Museo, na que a artista investiga sobre as cores da pel a través de pinturas e esculturas da exposición permanente do Museo, ata o 15 de setembro.
En xullo e agosto, o Museo organizará os obradoiros de verán dirixidos a nenas e nenos de 6 a 12 anos. Cada semana, nas mañás do martes ao venres, desenvolverase unha das quendas dos cinco obradoiros que se sucederán ao longo dos dous meses.
Serán un obradoiro da técnica de colaxe paste up, impartido por Sofía Venzel e Míchel Casado; a creación dun álbum de verán, coa ilustradora Alba Santa; un obradoiro de colaxe a cargo do ilustrador Diego Estebo; un taller de creación artística, por Leucoíña Pasea; e un obradoiro de historia e creación de mosaicos, impartido por Anastasia Ogando e Estefanía Viyella.
Ademais, os sábados 6, 13 e 20 de xullo, Taller Abierto desenvolverá percorridos en familia por A era das fábulas, dirixidos a nenas e nenos a partir de 6 anos na compañía dunha persoa adulta. Esta actividade contará con novas quendas no mes de setembro.
Pola súa banda, a programación de concertos do verán arranca co recital de lieder alemáns de Ralf Glasz (tenor) e Rasa Biveiniene Jakutyte (piano), que o mércores 26 de xuño interpretarán composicións de Ludwig van Beethoven e Franz Schubert. O venres da mesma semana, nun rexistro moi diferente, Santi Araújo presentará a bossa nova, folk e psicodelia do seu novo disco, Canciones para bailar.
Xa en xullo chegará a nova edición das Noites de Música Antiga, con tres concertos no claustro do Edificio Sarmiento: Vestigium o 5 de xullo, La Bellemont o día 12 e Ars Longa pechando o ciclo o venres 19 de xullo.
A programación musical complétase cunha charla-concerto o 27 de xuño, na que Rubén Troitiño afonda na historia de Avelino Cachafeiro e Os Gaiteiros de Soutelo.
O 21 de xuño, o ex secretario técnico do Museo, José Fuentes Alende, presenta o seu exhaustivo estudo en dous tomos sobre os exvotos en Galicia e a súa significación na relixosidade popular.
A programación de investigación e divulgación continúa coa xornada Arredor dun Feito Histórico. O Retorno de Castelao a Galicia, 28 de Xuño de 1984, na que protagonistas directos daquel día repasarán o acontecido aquel día cando se cumpren 40 aniversario do regreso dos restos de Castelao.
Finalmente, o 18 e 19 de xullo volverán ao Museo as Xornadas de Exiptoloxía, con dúas conferencias dos exiptólogos Teresa Bedman e Francisco Martín-Valentín.
Relacionadas:
-
'A era das fábulas', camiño de converterse na exposición máis visitada da historia do Museo de Pontevedra
Por Noticia patrocinada |
-
O Museo volve sacar á rúa 'A era das fábulas': "É unha iniciativa fabulosa"
Por Almu Dapena & Cristina Saiz |
-
O Museo convida á cidadanía a explorar a súa creatividade sacando á rúa 'A era das fábulas'
Por Oskar Viéitez |
-
Inaugurada 'A era das fábulas' no Museo: “A mellor exposición dos últimos vinte anos”
Por Mónica Patxot & Redacción |
-
"A era das fábulas", a exposición coa que o Museo quere ser un "faro de cultura"
Por Alejandro Espiño |
-
Concerto de Vestigium para iniciar as 'Noites de Música Antiga'
Por Redacción |
-
O Museo ofrece cinco obradoiros infantís para as mañás dos meses de xullo e agosto
Por Redacción |