O Museo ofrece cinco obradoiros infantís para as mañás dos meses de xullo e agosto
Por Redacción
O Museo de Pontevedra ofrecerá este verán un novo conxunto de obradoiros infantís para as mañás dos meses de xullo e agosto. Están dirixidos aos nenos de 6 a 12 anos, que se achegarán ás obras da colección do Museo e ás presentes na exposición temporal ‘A era das fábulas’ a través da ilustración, os mosaicos, o colaxe e outras técnicas creativas.
As inscricións aos obradoiros abren este martes 18 de xuño ás 9:00 horas a través da web do Museo.
Do 2 de xullo ao 30 de agosto, cada semana un grupo de rapaces participarán nunha das quendas dos cinco obradoiros que se ofrecen. Todos son de balde, contan con 15 prazas e desenvolveranse de martes a venres entre as 11:30 e as 13:00 horas. As prazas atribuiranse por orde de inscrición.
Do 2 ao 5 de xullo / do 9 ao 12 de xullo terá lugar o obradoiro de paste up 'Se a miña avoa tivese rodas'. Ata 1910 as mulleres tiñan restrinxido o acceso a estudos superiores. Mediante este obradoiro, impartido polos ilustradores especializados en arte urbana Sofía Venzel e Míchel Casado, os nenos participantes coñecerán de cerca a loita das mulleres pola igualdade mediante a técnica do colaxe paste up.
Do 16 ao 19 de xullo, está programado o obradoiro 'Álbum de Recordos dunhas Vacacións no Museo'. Tomando como referencia obras expostas no Museo de Pontevedra, os participantes ilustrarán e decorarán o seu propio álbum de verán. Este obradoiro impárteo a ilustradora Alba Santa.
Do 23 ao 26 de xullo: 'Creando Personaxes Xogando co Papel, obradoiro de colaxe'. O ilustrador Diego Estebo ensinaralles aos participantes a crear personaxes que se inspiren nalgunhas das obras expostas no Museo e a materializalos mediante a técnica da colaxe.
Do 6 ao 9 de agosto / do 13 ao 16 de agosto: 'Art Lab: Creamos... de Fábula'. Coa inspiración da exposición A era das fábulas, Leucoíña Pasea propón un obradoiro no que os nenos traballarán a imaxinación e a fantasía a través de creacións de Picasso, Maruja Mallo, Joan Miró ou Menchu Lamas, entre outras e outros artistas.
Do 20 ao 23 de agosto / do 27 ao 30 de agosto: 'Historia e Creación de Mosaicos'. A partir do mosaico coa representación de Baco presente na exposición A era das fábulas, a rapazada aprenderá sobre a rica historia desta arte e creará a súa propia obra. Este obradoiro impartirano Anastasia Ogando e Estefanía Viyella.
Relacionadas:
-
A Zona Monumental celebra a festa fin de curso
Por Redacción |
-
Propoñen converter o Faro de Ons nun museo
Por Oskar Viéitez |
-
A UNED Pontevedra aumenta a súa oferta formativa universitaria con doce cursos de verán
Por Redacción |
-
Este verán será "a era das fábulas" no Museo de Pontevedra
Por Redacción |