O talento audiovisual dos estudantes de Belas Artes triunfa na Mostra de Cinema Periférico
Por Redacción
Presentada como "unha cita única para o cine de vangarda", desde o pasado venres desenvólvese na Coruña a décimo quinta edición do festival (S8) Mostra de Cinema Periférico, que un ano máis volve dedicar unha das súas seccións ás creacións desenvolvidas polo alumnado de Belas Artes.
Sete estudantes da facultade pontevedresa presentaron na Filmoteca de Galicia unhas curtametraxes que realizaron como traballos académicos.
Héctor Pousa, Mayoor Baiju, Eva Lareo, Álvaro Trigo, Fabiola Quintela, María Martelo e Paula Pumares presentaron os seus traballos no marco da sección 'Paraíso’ deste festival, dirixida a promover o encontro entre o alumnado de Belas Artes das universidades de Vigo e Salamanca.
En "Hogar y raciocinio", Héctor Pousa contrapón a súa xeografía afectiva, na ría de Aldán a un imaxinario "que incide no desastre e na destrución"; e Mayoor Baiju é o autor de "Bandhangal", unha historia de amor dolorosa que viviu a súa chegada a Galicia da India.
Eva Lareo reuniu en "Boa viajem" unha serie de fragmentos dunha viaxe a Lisboa coas súas amigas. Outra das pezas seleccionadas foi "Exilio", na que Álvaro Trigo fai uso da animación "para falar dunha viaxe solitaria, onde o silencio e o baleiro guían o protagonista".
Baixo o título de "Golondrinas", Fabiola Quintela sumou ao festival un ensaio autobiográfico articulado a través de imaxes de arquivo, polas vivencias que marcaron a súa infancia; e "O niño da laverca", de María Martelo utilizou como columna vertebral da historia unha gravación dunha cea familiar.
Por último, a obra presentada por Paula Pumares foi "Fulgor", un autorretrato no que percorre as súas memorias e no que a familia e a súa vila natal "conforman unha paisaxe mental chea de nostalxia".
Belas Artes estivo tamén representada pola graduada Yasmina Farhani Luaces, seleccionada para a sección 'Sinais’, coa súa curta 'A terra ten glitch’, un dos resultados do taller 'A xogos coa realidade’, promovido pola Vicerreitoría do campus de Pontevedra e o festival Novos Cinemas.