O PSOE de Poio acusa o alcalde de querer tapar as súas falsidades cunha "irrelevante" baixada de impostos
Por Redacción
O PSOE de Poio cargou esta fin de semana contra o alcalde, Ángel Moldes, despois do seu anuncio de que rebaixará o imposto de vehículos e os vados no municipio. "Pretende tapar as súas mentiras con novas falsidades", aféalle o líder dos socialistas, Gregorio Agís, que cualifica de "irrelevante" a baixada anunciada.
Os socialistas tildan a redución de "irrisoria" porque equivale a apenas 2 euros de aforro anual por habitante na viñeta do coche. "O Concello deixará de recadar uns 37.000 euros anuais, nun municipio con máis de 17.200 habitantes", sinala.
"O señor Moldes fala de algo histórico, pero a veciñanza sabe facer contas e non vai ser enganada coas súas triquiñuelas", indica Gregorio Agís, que pensa que é unha "lamentable cortina de fume" coa que o alcalde "pretende tapar unha mentira moito máis grande".
Esa mentira á que se refire é que o PP anunciou durante a campaña unha redución do IBI en menos de tres meses e non o cumpriron. "Mentiron á veciñanza, porque nin a contemplan, nin a van a facer e, por iso, intentan xogar ao despiste cunha baixada absolutamente irrelevante", sinala Agís. Aféalle a Moldes que na oposición esixía a redución do IBI en 800.000 euros.
O líder do PSOE tamén critica que o Partido Popular saque peito de conxelar as taxas, pero o anterior Goberno local xa aplicou "sen excepcións" durante máis dunha década, ao que hai que sumar a aprobación de bonificacións en favor de familias numerosas e con menos recursos.
O PSOE ten claro que esta é un novo intento do Partido Popular de "tapar o que é evidente: a súa incapacidade de xestión".