Investigan o acoso a varias profesoras dun colexio de Cambados a través de cartas anónimas
Por Oskar Viéitez
A Garda Civil investiga o acoso que están a sufrir varias profesoras do colexio Antonio Magariños Pastoriza, en Cambados, tras a aparición de varias cartas anónimas e ameazantes contra elas.
O asunto, que denunciou o equipo directivo do centro, remóntase ao pasado 3 de novembro cando apareceron unha serie de cartas, dirixidas ás familias con fillos escolarizados neste colexio, sinalando a tres das súas profesoras.
Nelas, "acúsasenas con nomes e apelidos completos de exercer a prostitución fóra do horario escolar, esnaquizar matrimonios e cabronadas varias", advertindo ás nais de que non enviasen sós aos seus maridos ás titorías, segundo explican desde o colexio.
A dirección do centro asegura que esta non é a primeira vez que se reciben este tipo de cartas, xa que en abril do ano pasado o profesorado recibiu estes mesmos anónimos, excepto as mestras citadas, feitos que se repetiron ao finalizar o curso.
Ademais, o colexio ten coñecemento de que este ano estas cartas tamén foron recibidas noutro centro educativo co nome dunha mestra que cambiou de centro para ese novo colexio, a cal xa aparecı́a en as cartas do mes de abril.
As catro mestras nomeadas nestas misivas denunciaron o sucedido ante a Garda Civil.
De maneira paralela, o colexio Antonio Magariños Pastoriza trasladou os feitos ás autoridades educativas, que xa se reuniu coas mestras difamadas para falar sobre un suceso que, segundo a dirección, "está a afectar a todo o profesorado do colexio".