Aprobada en pleno a mellora das condicións do persoal municipal de Soutomaior
![Redacción](/web/cache/scene/uploads/xornalistas/foto/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/506490f5a15ce-c6ku5opwb5qbtijalxd0_reasonably_small.jpeg)
Por Redacción
Este luns debatíase en pleno a proposta do goberno local de Soutomaior para modificar a Relación de Postos de Traballo (RPT) para o persoal do Concello e acometer a suba dos complementos de destino.
A medida foi aprobada neste pleno extraordinario e entrará en vigor a partir do 1 de xaneiro de 2024.
Coa aprobación deste punto, o cadro de persoal municipal mellorará as súas condicións salariais. Manu Lourenzo, alcalde de Soutomaior, afirmou que a medida "resolverá unha situación de inxustiza salarial e laboral que levaban anos a vivir" no equipo de traballadores municipais.
Segundo expuxo, a última praza de administrativo que sacara o anterior goberno municipal quedou deserta debido a que presentaba peores condicións que prazas de grupos inferiores ofertadas por municipios de igual ou inferior capacidade que o de Soutomaior. Desta forma, non se cubriron as xubilacións e cada vez foi menor o número de empregados públicos da administración municipal, saturando de tarefas ao persoal, segundo explicou o rexedor.
Agradeceu a vontade de todas as partes durante o proceso negociador e a xenerosidade da secretaria-interventora que asumiu novas funcións para liberar a masa salarial suficiente que permitise a modificación.
Precisamente, a secretaria-interventora, que ata o de agora compartía funcións no Concello de Covelo, pasará a traballar de maneira íntegra en Soutomaior.
O goberno local ten previsto sacar dúas novas prazas para os servizos administrativos municipais, co obxectivo posto en modernizar a administración local e ofrecer unha prestación de servizos máis áxil á cidadanía.
Relacionadas:
-
'Gañémoslle ao machismo', lema de Soutomaior para o 25N coa idea de romper co heteropatriarcado no deporte
Por Redacción |
-
A examen os parques municipais de Soutomaior para estudar a súa rehabilitación
Por Oskar Viéitez |
-
Soutomaior reforzará en 2024 o servizo de limpeza e roza nas rúas do municipio
Por Redacción |