Un novo vial entre a N-541 e a Praza do Concello mellora a accesibilidade en Cerdedo
Por Redacción
Un novo vial entre a estrada N-541 e a Praza do Concello de Cerdedo acaba de contribuír a mellorar a accesibilidade nesta zona e a mellorar a súa imaxe urbana e a comodidade dos residentes na zona.
O alcalde do Concello de Cerdedo-Cotobade, Jorge Cubela, e a tenente de alcalde, Lourdes Ovelleiro, supervisaron o remate dos traballos de asfaltado levados a cabo pola empresa Covsa no novo vial que se abriu.
O Concello investiu máis de 100.000 euros en todo o proceso de apertura deste vial no que se tivo que chegar a un acordo cos propietarios de dous galpóns alí existentes, así como reformar o espazo, asfaltar o novo acceso e agora vaise a proceder a mellorar os muros, realizar un pintado horizontal e colocar mobiliario urbano para facilitar o goce por parte da veciñanza deste novo espazo de convivencia veciñal.
O Concello lembra que esta actuación fora un dos compromisos adquiridos polo equipo de goberno diante da veciñanza que agora se está executando.
Jorge Cubela cualificou de "moi satisfactoria" esta intervención, xa que mellorou o aspecto físico e a imaxe desta zona ao facer desaparecer os dous galpóns que afeaban a contorna.
Ademais, gañouse maior espazo e accesibilidade nun dos lugares emblemáticos de Cerdedo, a praza onde está o edificio administrativo e toda unha serie de emprazamentos de especial interese e uso da veciñanza.